تۇركىستان استانادان دا جىلدام دامىپ بارادى - نۇرسۇلتان نازاربايەۆ

بريفينگ بارىسىندا تۇڭعىش پرەزيدەنت تۇركىستاننىڭ دامۋىنا قاتىستى ءوز وي-پىكىرىن جەتكىزدى، دەپ حابارلايدى قازاقپارات ءتىلشىسى.

نۇرسۇلتان نازابايەۆتىڭ ايتۋىنشا، جاڭارعان تۇركىستان قازىر بارشا قازاقستاندىقتىڭ باستى نازارىندا.

«شىندىعىندا، مۇنداي قاراجات، مۇنداي كوڭىل جۇزدەگەن جىلدىق تاريحى بار تۇركىستانعا ەشقاشان بولىنگەن ەمەس. بۇعان دەيىن تۇركىستاننىڭ 1500 جىلدىعىن اتاپ وتكەندە «وسى تۇركىستاندى ءبىر كوتەرسەك» دەپ ارمانداپ ەدىم. الايدا ول كەزدە ەلدىڭ بۇعان جاعدايى بولا بەرمەدى. سول ارالىقتا مەملەكەت قۇرىلدى. قازاقستاندى نىعايتۋ مەن ەلىمىزدى دۇنيەجۇزىنە تانىتۋ كەرەك دەپ شاپقىلاپ جۇردىك. ەندى ۋاقىت كەلدى، 2018-جىلدىڭ ماۋسىم ايىندا شىمكەنت قالاسىن ميلليون تۇرعىنى بار دەپ ءبولىپ، مەن جارلىققا قول قويدىم. 2018-جىلدىڭ اياعىنا دەيىن ۇيىمداستىرۋمەن، دايىندىقپەن جۇردىك. بۇكىل قازاقستانداعى اۋقاتتى جىگىتتەردى جينادىم، مەملەكەتكە، اكىمدىككە تاپسىرما بەردىم. ءبىرىنشى باعدارلاما جاسادىق. وسىلايشا تۇركىستان وبلىسىنىڭ بولىنگەنىنە ءۇش جىلعا دا جەتكەن جوق، 2019-20-جىلداردىڭ ىشىندە 257 عيمارات سالىندى. كورىپ وتىرسىزدار. سول كەزبەن قازىرگى كەزدى سالىستىرۋعا بولا ما؟ جەر مەن كوكتەي. قازاقستاننىڭ 30 جىلداعى جەتكەن جەتىستىگى، ەڭبەگى جەر مەن كوكتەي»، - دەدى ن. نازاربايەۆ.

ەلباسى اتاپ وتكەندەي، تۇركىستاندى كوركەيتۋ ەلدىڭ استاناسىن سالۋمەن بىردەي كەرەمەت دۇنيە.

«حالقىمىز وتە تىعىز قونىستانعان، قايماعى بۇزىلماعان، ءداستۇرىمىز بەن مادەنيەتىمىز ساقتالعان ەلدە قالانى ورناتۋ بىرىنشىدەن، ەل ءۇشىن، ەكىنشىدەن وسى حالىققا جۇمىس بەرۋ ءۇشىن، مادەنيەتىن كوتەرۋ ءۇشىن، دۇنيەجۇزىنە قازاقستاندى پاش ەتەتىن ماسەلە بولدى. وعان قاراماي تۇركىستان وبلىس ورتالىعى بولعاننان كەيىن شىمكەنتتىڭ ءوزى وركەندەپ سالا بەردى. شىمكەنتتىڭ بيۋدجەتى ءۇش جىلدىڭ ىشىندە ءۇش ەسەگە ارتتى.

تۇرعىن ۇيلەردىڭ قۇرىلىسى ەكى ەسەگە كوتەرىلدى. ورتا جانە شاعىن كاسىپكەرلىك كوتەرىلدى. شىمكەنت قالاسىنىڭ ءوزى ءوسىپ، كەرەمەت بولىپ بارا جاتىر. ال، ەندى تۇركىستانعا كەلەتىن بولسا، الدا ءالى كوپ جۇمىس اتقارىلۋى كەرەك.

ارينە، بۇل وڭتۇستىكتە تۇراتىن اعايىندار ءۇشىن ۇمىتىلمايتىن جاعداي. تاۋەلسىزدىكتى باستاعان كەزدە جانىمدا جۇرگەن ازاماتتار ونى ەشقاشان ۇمىتپايدى. استانانى سالعانداعى ىستەگەن ءىسىمىزدى ەشكىم ۇمىتپايدى. تۇركىستاننىڭ قۇرىلىسى دا ۇمىتىلماي، ەستە قالاتىن جاعداي»، - دەدى تۇڭعىش پرەزيدەنت. ن. نازاربايەۆ تۇركىستان تۇركىتىلدەس ەلدەردىڭ رۋحاني استاناسى دەپ جاريالانعانىن ەسكە سالىپ ءوتتى.

«قازىردىڭ وزىندە دۇنيەجۇزىلىك دەڭگەيدەگى اۋەجايدى قازاقستاندا ءبىرىنشى رەت تۇركىستاندا سالدىق. ءقازىر ىستانبۇلدان ەكى رەيس كەلەدى، جاقىندا تاشكەنت، اشحاباد، بىشكەكتەن كەلەتىن بولادى. رەيستەر كوبەيىپ، حالىقارالىق پويىزدار قوسىلادى. سوندا كەلەتىن تۋريستەر سانى دا كوبەيەدى. جۇمىس قىزادى، جاستارعا جۇمىس ورىندارى اشىلادى. مۇمكىندىكتەر كوبەيەدى. مۇندا تاعى تۋريستەرگە قىزمەت ەتەتىن ۋنيۆەرسيتەت سالىندى. تۇركىستاندا حالىقارالىق دەڭگەيدەگى تەاتر سالىندى. مىنە، وسىنداي ويلاساق ويعا كەلمەيتىن ىستەر بولىپ جاتىر.

بۇعان قۋانايىق. وسىنىڭ ءبارى قازاقستاننىڭ 30 جىلدىعىنا جاساپ جاتقان تارتۋى. اتا- بابانىڭ ارمانىن ورىنداپ، تاۋەلسىز قازاقستاندى وسىلايشا كوركەيتىپ جاتىرمىز. اللا ءبىزدى بىرلىكتەن ايىرماسىن. ەلدىڭ ىشىندە اۋىزبىرشىلىك مىقتى بولسىن. قازاق بىرىككەندە - بارلىعىن جەڭەدى. بىلتىر كەلگەن ادام تۇركىستاندى قازىر تانىمايدى. اي سايىن، جىل سايىن وزگەرىپ تۇرادى. قالا استانادان دا تەز دامىپ، سالىنىپ جاتىر.

ەندىگى، 2025 جىلعا دەيىن بۇدان دا ۇلكەن، كەرەمەت بولادى. قازىر حالقىنىڭ سانى 200 مىڭ بولسا، 2025-جىلى 300 مىڭنان اسىپ كەتەدى دەگەن جوسپار بار. ءبىز ەلوردانى سالعان كەزدە 2030-جىلى حالقىنىڭ سانى ءبىر ميلليون بولادى دەگەنبىز.

قازىر 1 ميلليون 200 مىڭ، ءۇش ميلليون بولايىن دەپ تۇر. سوندىقتان مىناداي قارقىن بولسا - جەتەدى. حالىقتىڭ سۇرانىسى قانداي، ءتىپتى ىرگەتاسى قالانىپ جاتقان تۇرعىن ۇيلەردى ساتىپ العىسى كەلەدى. الداعى ءتورت جىلدىڭ ىشىندە تۇركىستاندا 26 مىڭ پاتەر سالىنادى دەپ جوسپارلانىپ وتىر»، - دەدى نۇرسۇلتان نازاربايەۆ.