افريكادان ەڭ ەجەلگى ادامنىڭ قابىرى تابىلدى

None
None
نۇر-سۇلتان. قازاقپارات - افريكادا قازبا جۇمىستارىن جاساپ جۇرگەن ارحەولوگتار ەجەلگى ادامنىڭ ءمايىتىن تاپتى.

عالىمداردىڭ ايتۋىنشا، تابىلعان قابىر قازىرگى عىلىمعا بەلگىلى مايىتتەردىڭ ەڭ ەجەلگىسى. بۇل جايلى Reuters حابارلادى.

ارحەولوگتار تاپقان ءمايىت ەرەسەك ادامدىكى ەمەس، 2-3 جاسار بالانىكى. ونى كەنيا جاعالاۋىنا جاقىن ۇڭگىردەن تاپقان.

بالانى ۇل نە قىز ەكەنىن انىقتاۋ قيىن. ويتكەنى كىشكەنتاي كەزدە بالالاردىڭ سۇيەگى بىردەي بولادى. ال د ن ك ارقىلى انىقتاۋعا گەنەتيكالىق ماتەريالدارى قالماعان.

جۇرگىزىلگەن ساراپتامانىڭ ارقاسىندا بالانىڭ وسىدان 78 مىڭ جىل بۇرىن قايتىس بولعانى بەلگىلى بولدى. بۇل - ورتا تاس عاسىرىنا ءتان كەزەڭ.

زەرتحانالىق زەرتتەۋلەر كورسەتكەندەي، بالا قابىرگە جاتىردا جاتقان كەيىپپەن جەرلەنگەن. ال باسىنا سۇيەنىش (جاستىق بولۋى دا مۇمكىن) قويىپ، ءمايىتتىڭ ءۇستىن جاپىراقپەن، جانۋار تەرىسىمەن جاپقان. سوعان قاراعاندا، ورتا تاس عاسىرىندا ءومىر سۇرگەن ادامداردىڭ ءوزى جەرلەۋگە ەرەكشە كوڭىل ءبولىپ، ونى ريتۋال ساناعانعا ۇقسايدى. ءارى جەرلەۋدى سانالى تۇردە جاساعان.

«سوعان قاراعاندا بالانىڭ اتا- اناسى قاتتى قايعىرعان سياقتى. ءارى بالاسىن ارۋلاپ، ىزەت كورسەتىپ كومگەن»، - دەيدى CENIEH ديرەكتورى، يسپان انتروپولوگى ماريا مارتينون- توررەس.

ارحەولوگتاردىڭ ايتۋىنشا، اتالمىش ارتەفاكتىنىڭ ماڭىزى زور. ويتكەنى وسىدان 30-40 مىڭ جىل بۇرىنعى ادام سۇيەكتەرى تابىلعانىمەن، ودان كونە ادام ءمايىتى تابىلعان ەمەس. بۇل جاڭالىق عىلىمدا تاعى جاڭا گيپوتەزالار قۇرۋعا دايەك بولماق.


سوڭعى جاڭالىقتار