ەلوردا تۇرعىنى ويىن الاڭىندا جۇرگەن بالالاردى ءبىر- بىرىمەن توبەلەسۋگە ماجبۇرلەدى
وندا ەر ادام ويىن الاڭىندا بالالاردى ءبىر- بىرىمەن توبەلەسۋگە ماجبۇرلەگەن، دەپ حابارلايدى قازاقپارات.
«الەۋمەتتىك جەلىلەرگە جۇرگىزىلگەن مونيتورينگ جۇمىستارى بارىسىندا ەر ادامنىڭ بالالاردى توبەلەسۋگە ماجبۇرلەگەن ۆيدەوسى انىقتالدى. اتالعان فاكتى بويىنشا پوليسياعا 37 جاستاعى قالا تۇرعىنى جەتكىزىلدى. ول باباتاي ۇلى كۇشەسىندەگى ويىن الاڭىندا ءوزىنىڭ 8 جاستاعى بالاسى مەن ونى رەنجىتكەن 11 جاستاعى بالانى توبەلەسۋگە شاقىرعان»، - دەپ مالىمدەدى نۇر- سۇلتان قالالىق پوليسيا دەپارتامەنتىنىڭ باسپا ءسوز قىزمەتى.
توبەلەس سالدارىنان 11 جاستاعى بالا جاراقات العان. زارداپ شەككەن بالانىڭ اناسىنان كىنالى ازاماتقا شارا قولدانۋ تۋرالى ارىز ءتۇستى. پوليسيا سونىمەن قاتار ەر ادامنىڭ اكىمشىلىك جاۋاپقا تارتىلعانىن حابارلادى. ءىس ماتەريالدارى پروتسەسسۋالدىق شەشىم شىعارۋ ءۇشىن مامانداندىرىلعان اۋدانارالىق سوتقا جولداندى.
نۇر- سۇلتان قالاسىنىڭ پوليتسيا دەپارتامەنتى ەرەسەكتەر تاراپىنان مۇنداي قادامدارعا جول بەرىلمەيتىنىن ەسكەرتەدى. قولدانىستاعى زاڭناماعا بايلانىستى بالالاردىڭ قۇقىقتارىنىڭ بۇزىلعانى، ولاردىڭ دەنساۋلىعىنا زاقىم كەلتىرگەنى ءۇشىن جاۋاپكەرشىلىك قاراستىرىلعان.