جايىق كيىگىنىڭ سانى قانشا؟

None
None
نۇر-سۇلتان. قازاقپارات - پرەمەر-ءمينيستردىڭ ورىنباسارى رومان سكليار پارلامەنت وكىلدەرىنىڭ دەپۋتاتتىق ساۋالىنا بەرگەن جاۋابىندا «بوكەيوردا» تابيعي رەزەرۆاتىنىڭ قۇرىلىسى تۋرالى مالىمەت بەردى، دەپ حابارلايدى قازاقپارات ءتىلشىسى.

«قازاقستان اۋماعىندا بەتپاقدالا، جايىق جانە ءۇستىرت كيىكتەرىنىڭ الەمدىك پوپۋلياتسياسىنىڭ %95 دان استامى مەكەندەيدى. بۇگىنگى تاڭدا جايىق كيىكتەرىنىڭ پوپۋلياتسياسى 217 مىڭ باسقا جەتتى نەمەسە بۇل قازاقستانداعى بارلىق كيىكتىڭ %65 دەگەن ءسوز. جايىق كيىكتەرىنىڭ تىرشىلىك اياسىن ساقتاۋ ءۇشىن باتىس قازاقستان وبلىسىنداعى «بوكەيوردا» مەملەكەتتىك تابيعي رەزەرۆاتىن جانە اشىوزەك مەملەكەتتىك تابيعي قاۋمالىن قۇرۋ بويىنشا ءبىرقاتار ءىس-شارا جۇرگىزىلىپ جاتىر»، - دەپ جازىلعان جاۋاپتا.

رومان سكلياردىڭ ايتۋىنشا، باتىس قازاقستان وبلىسىندا تابيعي رەزەراۆات پەن قاۋمال قۇرۋ ءۇشىن زاڭنامانىڭ جەكەلەگەن تالاپتارىن ورىنداۋ قاجەت، ونىڭ ىشىندە كەلەسى ءىس- شارالار ورىندالعان: 1) شتاتتىق سانى 78 بىرلىك، جالپى الاڭى 343040,1 گەكتار رەزەرۆات جانە جالپى الاڭى 314504 گەكتار قاۋمال قۇرۋ ءۇشىن تەحنيكالىق-ەكونوميكالىق نەگىزدەمە ازىرلەندى جانە مەملەكەتتىك ەكولوگيالىق ساراپتامانىڭ قورىتىندىسى الىندى؛

2) «رەسپۋبليكالىق ماڭىزى بار اشىوزەك مەملەكەتتىك تابيعي قاۋمالىن جانە «بوكەيوردا مەملەكەتتىك تابيعي رەزەرۆاتى» رەسپۋبليكالىق مەملەكەتتىك مەكەمەسىن قۇرۋ تۋرالى» ۇكىمەت قاۋلىسىنىڭ جوباسى ازىرلەندى.

3) مەملەكەت باسشىسى رەزەرۆات پەن قاۋمالدىڭ قىزمەتىن قامتاماسىز ەتۋ ءۇشىن شتات سانىن ءبولۋدى ماقۇلدادى؛

4) قازىرگى ۋاقىتتا 2021-جىلعا ارنالعان رەزەرۆات پەن قاۋمال قۇرۋ ءۇشىن بيۋدجەتتىك ءوتىنىم قالىپتاستىرىلىپ، ول رەسپۋبليكالىق بيۋدجەت كوميسسياسىنىڭ قاراۋىنا ەنگىزىلەدى.

ەسكە سالساق، ءماجىلىس دەپۋتاتى ايجان ىسقاقوۆا باتىس قازاقستان وبلىسىندا «بوكەيوردا» مەملەكەتتىك تابيعي رەزەرۆاتىن قۇرۋ جوباسى نەگە توقتاپ قالعانىن سۇراپ، ۇكىمەتكە ساۋال جولداعان بولاتىن.

سوڭعى جاڭالىقتار