+7 (701) 759 90 19
20 °С : نۇر-سۇلتان
21 °С : الماتى
USD 427.15 EUR 519.12
RUB 5.96 CNY 66.84
جاڭالىقتار

موڭعوليادان كوشىپ كەلگەن قانداسىمىز ءتورت تۇلىكتى تولدەتىپ، ميلليونەر اتانىپ وتىر

10 مامىر 11:58
:ءبولىسۋ
موڭعوليادان كوشىپ كەلگەن قانداسىمىز ءتورت تۇلىكتى تولدەتىپ، ميلليونەر اتانىپ وتىر

تالدىقورعان. قازاقپارات - الماتى وبلىسىندا موڭعوليادان كوشىپ كەلگەن ميلليونەر قاجىكەن ۇلى ءتورت تۇلىكتى تولدەتىپ، ميلليونەر اتانىپ وتىر.

ول العاشىندا كاسىبىن ەكى بيە، ءۇش ىنگەنمەن باستاعان، دەپ حابارلايدى قازاقپارات ءتىلشىسى.

قازىر تۇيە سانى 30 عا جۋىقتادى. جىلقىسى 60 تان استى. بيە مەن تۇيە ساۋىپ، حالىققا قىمىز-شۇباتىن ۇسىنىپ وتىر.

كاسىپكەر كۇنىنە 50 ليترگە دەيىن قىمىز اشىتادى. قىمىزدىڭ ءار ليترىن 700 تەڭگەگە باعالاساق، كاسىپكەردىڭ بيزنەسىنىڭ تاسى ورگە دومالاپ وتىرعانىن تۇسىنۋگە بولادى.

«اتاجۇرتقا كەلگەن - ءبىر باقىت، ەلگە كەلىپ، ەڭبەك ەتىپ، ەڭسە تۇزەپ، ۇرپاق وربىتكەن - ءبىر باقىت. ءبىر جاعادان باس، ءبىر جەڭنەن قول شىعاراتىن حالگە جەتتىك. قازىر ەڭبەك ەتكەن كىسىگە ءبارى بار. قولى قيمىلداعاننىڭ اۋزى قيمىلدايدى. وسى تاۋەلسىزدىگىمىزدىڭ ارقاسىندا ەلىمىزگە كەلىپ، بەيبىت زاماندا باقىتتى عۇمىر كەشىپ جاتىرمىز»، - دەيدى تالدىقورعانعا قاراستى مويناق اۋىلىنىڭ تۇرعىنى ميلليونەر قاجىكەن ۇلى.

وتاعاسىنىڭ ەرەكشە ەسىمىنە كەلەر بولساق، موڭعوليادا اناسىن بوساندىرعان ۇلتى ورىس اكۋشەر ميلليونەر قويىپتى.

ميلليونەر قاجىكەن ۇلى مەن مايرا ساياسي قىزى ءۇش ۇل، ەكى قىز تاربيەلەپ وسىرگەن. ۇلدارىنىڭ الدى مال شارۋاشىلىعىندا بولسا، كەلىندەرى ەنە جولىن قۋىپ، مالدان الىنعان ءونىمدى ءوندىرىپ، قۇرت- ماي جاساپ، شارۋانى ۇقساتىپ وتىر. وتباسىلىق كاسىپتە كىشكەنتاي نەمەرەلەرگە دە جۇمىس بار. ءبىرى قوزى-لاققا قاراسا، ەرەسەكتەرى اجەسىنە ماي شايقاپ، قۇرت جاساپ قولعابىس ەتەدى.

بۇل اۋلەت بىلتىر ىندەت قاھارىنا مىنگەن تۇستا تابيعي «اقتاماق» ونىمىمەن ناۋقاستاردىڭ تەز وڭالىپ كەتۋىنە ءبىر كىسىدەي ۇلەس قوستى.

«دەنساۋلىعىنا بايلانىستى قانى ازايعان ادامدار، وكپەسى اۋىرعاندار، بورتكەن شىققان ادامدار، ىشكى قۇرىلىسى اۋىراتىن ايەلدەر بىزگە ءجيى كەلەدى. ساۋمال ىشەدى. تۇيەنىڭ وركەشىن كوپ سۇرايدى. سەبەبى، ول - ايەلدەردىڭ قاتەرلى ىسىك اۋرۋىنا ەم»، - دەيدى مايرا ساياسي قىزى.

جالپى جەتىسۋ جەرىنە قونىس اۋدارعان قانداستاردىڭ دەنى مال شارۋاشىلىعىمەن اينالىسادى. اتا كاسىپتەن بولەك قولونەر شەبەرلەرى، ورتا جانە شاعىن بيزنەستە ەل دامۋىنا ءوز ۇلەسىن قوسىپ كەلەدى. ەل تاۋەلسىزدىگىنىڭ 30 جىلىندا الماتى وبلىسىنا 20 دان استام ەلدەن 214 مىڭداي قانداسىمىز كوشىپ كەلگەن.

بۇل - شامامەن 69 مىڭ وتباسى. ۇلى كوشتىڭ باسىندا تۇرعان باۋىرلارىمىز بۇگىندە ەكىنشى بۋىن ۇرپاق ءوربىتىپ، مەملەكەتىمىزدىڭ وركەندەۋىنە ءبىر كىسىدەي ۇلەس قوسىپ كەلەدى.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات