11:11, 09 - مامىر 2021 | GMT +6
ەلوردادا جاستار مەن سپورتشىلار ۆاكسينا سالدىرتتى
نۇر-سۇلتان. قازاقپارات - نۇر-سۇلتان قالاسىندا جاستار مەن سپورتشىلار COVID-19 ينفەكسياسىنا قارسى ۆاكسينا قابىلدادى، دەپ حابارلايدى قازاقپارات ەلوردا اكىمدىگىنىڭ رەسمي سايتىنا سىلتەمە جاساپ.
«ءاربىر قازاقستان ازاماتى ءوزىمىز ءۇشىن عانا ەمەس جاقىندارىمىز ءۇشىن دە ۆاكسينا قابىلداۋىمىز مىندەت. وزگەلەردىڭ دە دەنساۋلىعىنا الاڭداۋىمىز كەرەك. سول سەبەپتى جاستاردىڭ كوشباسشىسى رەتىندە ۆاكسينانى قابىلدادىم»، - دەدى «جاس سارباز» جاس وسپىرىمدەر اسكەري-پاتريوتتىق قوزعالىسى قالالىق فيليالىنىڭ ءتوراعاسى اسحات نالشىبەك.
ال كاسىبي جەكپە-جەك كلۋبىنىڭ جەتەكشىسى ءوز سوزىندە قالىڭ كوپشىلىككە ۆاكسينا سالدىرۋعا كەڭەس بەرەتىنىن ايتتى.
«مەنىڭ جەتەكشىلىگىممەن ءبىراز ادام سپورتپەن اينالىسىپ ءجۇر. ءوز ەلىمنىڭ پاتريوتى رەتىندە ۆاكسينانى العاشقىلاردىڭ ءبىرى قابىلداۋىم مىندەت. ۆاكسينانى جىلدام قابىلدادىم. قانداي دا ءبىر اۋىرۋ بايقالعان جوق. بارىنە ۆاكسيناتسيادان وتۋگە كەڭەس بەرەمىن»، — دەدى كاسىبي جەكپە- جەك كلۋبىنىڭ جەتەكشىسى ۆاسيلي تاحتاي.