ەلباسى قازاقستان حالقىن جەڭىس كۇنى مەرەكەسىمەن قۇتتىقتادى
بۇل تۋرالى ەلباسىنىڭ رەسمي سايتى حابارلادى.
«قازاقپارات» ح ا ا وقىرمان نازارىنا قۇتتتىقتاۋ ءماتىنىن ۇسىنادى.
ەلباسى نۇرسۇلتان نازاربايەۆتىڭ جەڭىس كۇنىمەن قۇتتىقتاۋى قۇرمەتتى
قازاقستاندىقتار!
جىل سايىن 9- مامىر كۇنى ءبىز اكەلەرىمىز بەن اتالارىمىزدىڭ ادامزات تاريحىنداعى ەڭ سۇراپىل سوعىستا كورسەتكەن ەرەن ەرلىگى مەن قاھارماندىعىن ەسكە الامىز.
بۇل كۇنى ءبىز ءۇشىن زور ماقتانىش پەن ناعىز پاتريوتيزمنىڭ ۇلگىسىنە اينالعان ارداگەرلەردىڭ الدىندا باسىمىزدى يەمىز.
سوعىس قۇرباندارىنا تاعزىم ەتىپ، وسى كۇنگە امان جەتكەندەرگە قۇرمەت كورسەتەمىز. ولاردىڭ جاۋىنگەرلىك ەرلىگى مەن تىلداعى ەڭبەگىنىڭ ارقاسىندا ءبىز بەيبىت ءارى تاۋەلسىز مەملەكەتتە ءومىر ءسۇرىپ جاتىرمىز. وتان ءۇشىن وت كەشكەندەردىڭ ەرلىگىن ۇمىتپاي، ونى كەيىنگى ۇرپاققا ۇلگى ەتۋ - ءبىزدىڭ قاستەرلى بورىشىمىز.
1945-جىلعى مامىر ايىنداعى ۇلى جەڭىس ورتاق ماقساتقا جۇمىلعان حالىقتاردىڭ اۋىزبىرلىگىنىڭ، دوستىعى مەن ءوزارا كومەگىنىڭ جارقىن سيمۆولىنا اينالدى.
بىرلىگى جاراسقان قوعام عانا زور جەتىستىكتەرگە جەتە الاتىنىن حالقىمىز جاقسى بىلەدى.
تاۋەلسىزدىكتىڭ وتىز جىلىنداعى تاجىريبەمىز - سونىڭ ايقىن دالەلى. ءبىز وسى كەزەڭدە قۋاتتى ءارى وركەندەگەن مەملەكەت قۇردىق. ءوزارا سىيلاستىق، تۇراقتىلىق پەن تىنىشتىق ەلىمىزدىڭ ورنىقتى ءارى ۇيلەسىمدى دامۋىنىڭ كەپىلى بولدى. تاريحتان ساباق الىپ، حالقىمىزدىڭ بىرلىگىن ەڭ باستى قۇندىلىق رەتىندە ساقتاپ كەلەمىز.
الداعى ۋاقىتتا دا سولاي بولارىنا سەنەمىن. بارشاڭىزدى جەڭىس كۇنىمەن شىن جۇرەكتەن قۇتتىقتايمىن!
مىقتى دەنساۋلىق، باياندى باقىت، ۇزاق عۇمىر تىلەيمىن! اسپانىمىز ءاردايىم اشىق بولسىن!