تاۋەلسىز قازاقستاننىڭ ءتىرى باتىرلارى

None
None
نۇر- سۇلتان. قازاقپارات – 7 -مامىر سايىن ەسىمدەرى ەل نازارىنا ۇسىنىلاتىن ات توبەلىندەي عانا ازاماتتار بار. ولار - كاسىبي مىندەتتەرىن جۇمىستان تىس ومىرىنەن ءبولىپ قارامايتىن، توسىن ساتتە توسىلىپ قالماعان ارەكەتتەرى ءۇشىن قاھارمان اتانعان قاراپايىم قازاقستاندىقتار، دەپ حابارلايدى قازاقپارات ءتىلشىسى.

ءبىر ءۇيلى جاندى قىزىل جالىننان قۇتقارىپ قالعان

ازامات جۇمادىلوۆكە «حالىق قاھارمانى» اتاعى مەن «وتان» وردەنى 2007 -جىلى 4 ادامدى قىزىل جالىننىڭ ورتاسىنان امان الىپ شىققانى ءۇشىن بەرىلگەن ەكەن. №12881 اسكەري ءبولىم كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى- ءبولىم باستىعى باسىنان وتكەن سول ءبىر وقيعانى بىلاي دەپ ەسكە الادى.

«2007 -جىلدىڭ 10 -قازانىندا انامدى تۋىستارعا اپارىپ، قايتىپ كەلە جاتقانبىز. تۇنگى ساعات بىرلەردىڭ كەزى بولاتىن. اۋلالاردىڭ بىرىندە قارا ءتۇتىننىڭ بۋداقتاپ جاتقانىن بايقادىم. بىردەن ءورت ورنىنا قاراي جۇگىردىم. عيمارات ەكى مەترلىك دۋالمەن، دۋالدىڭ ءۇستى تىكەنەك سىممەن قورشالعان ەكەن. قاقپانىڭ ىسىرماسىن قيراتۋعا تۋرا كەلدى. قىزىل جالىنعا ورانعان ۇيدەن اۋەلى جىلاپ وتىرعان بالانى الىپ شىقتىم دا، اۋىزعى ۇيدەگى گاز باللونىن سىرتقا لاقتىردىم. سودان كەيىن ەكى ءجاسوسپىرىم مەن ولاردىڭ اناسىن وتتىڭ ورتاسىنان الىپ شىقتىم. ءبىز شىعا بەرگەندە ءۇيدىڭ شاتىرى ورتاسىنا ءتۇستى»، - دەيدى پودپولكوۆنيك.

وسى ەرلىگى ءۇشىن وعان «حالىق قاھارمانى» اتاعى بەرىلدى.

15 كورشىسىن اجالدان اراشالاعان

ال ەفرەيتور قۋاندىق قاناتوۆ 2019 -جىلدىڭ اقپان ايىندا بەس قاباتتى ۇيدەگى ورتتەن 15 كورشىسىن قۇتقارىپ قالعانى ءۇشىن پرەزيدەنت قاسىم- جومارت توقايەۆتىڭ قولىنان ماراپات الدى. بىلتىر ول «قازاقستاننىڭ 100 جاڭا ەسىمى» جوباسىنىڭ جەڭىمپازى اتاندى.

«بالا ۇيىقتاتىپ جاتقان ايەلىم دالىزدەن شىققان ءتۇتىن ءيىسىن اڭعارىپ، مەنى وياتتى. ىلعي جانىمدا گازتۇتقىش باسكيىم بىرگە جۇرەتىن. الگى ادەتىم سول جولى ءبىر كەرەگىمە جارادى. الدىمەن مەن ءورت تۇتانعان جەردى انىقتاپ، ماڭايىنداعى پاتەرلەردى ارالاي باستادىم. دالىزگە جينالعان تۇرعىنداردى سىرتقا باستادىم. ولاردى شىعارعان سوڭ ءوز وتباسىمدى سىرتقا الىپ شىقتىم. ءورتتى سەزبەستەن ۇيىقتاي بەرگەندەر بولدى. ولاردى وياتۋعا تۋرا كەلدى. ءوستىپ ءجۇرىپ قىستىڭ قاقاعان ايازى دەنەمنەن ءوتىپ كەتكەنىن دە سەزبەپپىن. ءبىر كەزدە ءورت سوندىرۋشىلەر كەلدى. ولارعا ءالى شىعىپ ۇلگەرمەگەن كورشىلەردى قۇتقارۋعا كومەكتەستىك»، - دەپ ەسكە الادى سارباز.

ءورت سوندىرۋشىلەر كەلگەنشە قۋاندىق 15 كورشىسىن سىرتقا شىعارىپ ۇلگەرگەن بولاتىن. وسى ەرلىگى ءۇشىن ول قورعانىس ءمينيسترىنىڭ العىس حاتىنا يە بولىپ، پرەزيدەنت قاسىم- جومارت توقايەۆتىڭ قولىنان «ەرلىگى ءۇشىن» مەدالىن الدى.

ەرلىگىمەن ەلگە تانىلعان كەزدە قۋاندىق قاناتوۆ №35411 اسكەري ءبولىمنىڭ 2- ارتيللەريالىق ديۆيزيونىنىڭ مەحانيك- جۇرگىزۋشىسى بولىپ جۇرگەن بولاتىن.

سۋعا جۇزگىش مايور

مايور الىشەر تابىلديەۆ سۋعا باتىپ بارا جاتقان بالانى قۇتقارعانى ءۇشىن I دارەجەلى «ەل قورعانى» مەدالىمەن ماراپاتتالعان. 2019 -جىلدىڭ 25 - تامىزىندا، كەشكى ساعات 18.00 شاماسىندا وسكەمەن قالاسىنداعى ءۇلبى وزەنىنىڭ جاعاسىندا وتباسىمەن سەرۋەندەپ جۇرگەن اسكەري قىزمەتشى ەكى جاسار بالانىڭ 10 مەتر بيىكتەن سۋعا قۇلاعانىن ەستيدى. دەرەۋ سۋعا سەكىرگەن الىشەر تابىلديەۆ ەكى جاسار ۇلدى اعىسى قاتتى وزەننەن امان الىپ شىعادى.

وسى جانقيارلىعى ءۇشىن وعان پرەزيدەنتتىڭ 2020 -جىلعى 5 -ماۋسىمداعى № 260 جارلىعىمەن ءى دارەجەلى «ەل قورعانى» مەدالى بەرىلدى.

پوستىنا ادال كۋرسانتتار

ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ 4 -كۋرسىندا وقىپ جۇرگەن باقىتجان باراتوۆ پەن الىشەر بەكزاتوۆ COVID-19 ىندەتىنە بايلانىستى جاريالانعان توتەنشە جاعداي كەزىندە الماتىنىڭ سىرتىنداعى بلوكپوستى اينالىپ وتپەك بولعان قارۋلى ازاماتتاردى توقتاتقانى ءۇشىن II دارەجەلى «ەل قورعانى» مەدالىمەن ماراپاتتالدى.

كۋرسانتتار بلوكپوستى اينالىپ ءوتىپ، باقىلاۋداعى ايماققا زاڭسىز وتۋگە تىرىسقان ازاماتتاردى دەر كەزىندە بايقاپ، كەرى قايتارۋعا ارەكەتتەنەدى. قارسى تاراپ ولاردىڭ ايتقانىن ورىنداۋدىڭ ورنىنا پىشاق سىلتەپ، قارۋلى قارسىلىق كورسەتكەن. ەكى كۋرسانت قورعانىس ءمينيسترىنىڭ 14 -ساۋىردەگى № 166 بۇيرىعىمەن II دارەجەلى «ەل قورعانى» مەدالىمەن ماراپاتتالدى.

«ورمەكشى» دەسانت

№61993 اسكەري بولىمدەگى دەسانتتىق- بارلاۋ روتاسىنىڭ 2- بولىمشە كومانديرى، سەرجانت عالىمجان الەۋحانوۆ ورتەنگەن ۇيدە ەس- ءتۇسسىز جاتقان ەكى بالانى قۇتقارعانى ءۇشىن «ەرلىگى ءۇشىن» مەدالىن يەلەنگەن.

2017 -جىلدىڭ 28 -شىلدەسىندە جۇمىستان كەلە جاتقان عالىمجان تۇرعىن ۇيلەردىڭ بىرىندە تەرەزەدەن شىعىپ جاتقان جالىندى كورەدى. بىردەن ءورت ءسوندىرۋ ساتىسىمەن تۇرعىن ءۇيدىڭ توبەسىنە شىعىپ، شاتىردى تەسىپ، دالىزگە تۇسەدى. ابىروي بولعاندا، ءورت شىققان پاتەردىڭ ەسىگى ىشتەن قۇلىپتالماعان ەدى. عالىمجان پاتەرگە كىرگەن بويدا داۋىستاپ، ىشتە كىم بار ەكەنىن سۇرايدى. جاۋاپ بولماعان سوڭ، قويۋ ءتۇتىن اراسىنا كىرىپ، ءۇيدىڭ ءىشىن ارالاي باستايدى. وسى كەزدە جاتىن بولمەدە 4-5 جاستاعى ەكى بالاعا جولىعادى.

«بالالار ەس- ءتۇسسىز كۇيدە ەدى. ۋلى ءتۇتىن وكپەلەرىنە ءوتىپ كەتكەنىن بىردەن ءتۇسىندىم. ولاردى سىرتقا شىعارىپ، جەدەل جاردەم وكىلدەرىنە تاپسىردىم»، - دەيدى عالىمجان الەۋحانوۆ.

وسى ەرلىگى ءۇشىن سەرجانت پرەزيدەنتتىڭ 2018 -جىلعى 27-ساۋىردەگى № 11354 جارلىعىمەن «ەرلىگى ءۇشىن» مەدالىنە يە بولدى.

سوڭعى جاڭالىقتار