13:34, 06 - مامىر 2021 | GMT +6
تۇركيادا ءبىر ۆيدەو سالدارىنان قوناق ءۇي جابىلدى
نۇر-سۇلتان. قازاقپارات - سيدە قالاسىنداعى Bosphorus Sorgun قوناق ۇيىندە وتكەن پاسحا كەشى جەرگىلىكتى تۇرعىندار مەن بيلىكتىڭ تەرىس رەاكسياسىن تۋدىردى، - دەپ حابارلايدى tourdom.ru باسىلىمىنا سىلتەمە جاساپ.
ساۋىق كەشىندە جۇزدەگەن قوناق قاۋىپسىزدىك شارالارىن ساقتاماعان. تۇركيادا قاتاڭ كارانتين كەزىندە ادام كوپ جينالعان شارانىڭ وتكەنى تۋرالى كەشەنگە كەلگەن قوناقتاردىڭ جەلىدە تاراتقان ۆيدەوسىنان كەيىن بەلگىلى بولدى.
Antalya Hakkinda باسىلىمىنىڭ مالىمەتىنشە، كەش پاسحا مەرەكەسىنە ارنالدى. جەلىدە تاراعان كادرلاردا الەۋمەتتىك قاشىقتىق ساقتاماي، بەتپەردەسىز كوڭىل كوتەرگەن ادام كوپ. جەكە قورعانىس قۇرالدارى تەك قىزمەتكەرلەردە كورىنەدى.
انتاليا بيلىگى قوناق ءۇيدى جاۋىپ، ونىڭ قاۋىپسىز تۋريزم سەرتيفيكاتىن الىپ تاستاۋ تۋرالى شەشىم شىعاردى. قوناق ءۇي كەشەنىندە دەمالۋشىلارعا قاتىستى قانداي شارا قولدانىلاتىنى تۋرالى ءالى حابارلانعان جوق.