قىرعىزستانداعى بارلىق بيلىك پرەزيدەنتتىڭ ۋىسىندا بولادى

قىرعىزستان باسشىسى سادىر جاپاروۆ ەلدىڭ جاڭا كونستيتۋتسياسىنا قول قويدى. وسىلايشا ەلدەگى بار بيلىك ەندى پرەزيدەنتتىڭ قولىندا بولادى. بۇدان بىلاي قىرعىزستاننىڭ سىرتقى ساياساتىنا دا، ىشكى ماسەلەلەرىنە دە تەك مەملەكەت باسشىسى عانا جاۋاپ بەرەدى. ۇكىمەتتى باسقاراتىن دا سول.

وسىلايشا بيلىكتىڭ جىبەرگەن قاتەلىگى ءۇشىن كىمنىڭ جاۋاپ بەرەتىنىن حالىققا تۇسىنۋگە جەڭىل بولادى. سادىر جاپاروۆ وسىلاي دەدى. جاڭا كونستيتۋتسياعا سايكەس، پرەزيدەنت بەس جىل مەرزىمگە ەكى رەت سايلانا الادى. الدىڭعى رەداكسيا بويىنشا مەملەكەت باسشىسى تەك ءبىر رەت عانا 6 جىلدىق مەرزىمگە سايلاناتىن.

سادىر جاپاروۆ، قىرعىزستان پرەزيدەنتى:

- مەن جۇمىسىمدى قۇقىقتىق جۇيەنى رەفورمالاۋدان باستايمىن. قۇقىق قورعاۋ قۇرىلىمدارى مەن سوت بيلىگى قىرعىزستاندىقتاردىڭ قۇقىعىن قورعاۋدىڭ ورنىنا ادامداردى قورقىتۋ قۇرالدارىنا اينالدى. ادىلەتسىزدىك قوعامنىڭ بولىنۋىنە، مەملەكەتتىك ورگاندارعا دەگەن سەنىمنىڭ تومەندەۋىنە اكەلدى. كىناسىزدىك پرەزۋمپتسياسى ادامنىڭ مۇددەلەرىن قورعاۋدىڭ ورنىنا ايىپتاۋ جولىندا جۇمىس ىستەيدى. بۇدان ارىلۋ قاجەت.

پارلامەنت وكىلەتتىگىنىڭ ءبىر بولىگى پرەزيدەنتكە ءوتتى. ماسەلەن، بۇرىن جوگوركۋ كەنەش مينيسترلەردى ۇسىنىپ، تالقىلاۋدان كەيىن ولاردى تاعايىندايتىن. ەندى بۇل پرەزيدەنتتىڭ وكىلەتتىگى. ياعني مينيسترلەردى مەملەكەت باسشىسى تاعايىندايدى. ال پارلامەنت ۇمىتكەرلەردى ماقۇلداۋعا عانا قۇقىلى.

مەدەتكان شەريمكۋلوۆ، قوعام قايراتكەرى:

- قازىر ءبىز ءۇشىن ەڭ باستىسى ەكونوميكانى كوتەرۋ. سوندا ءومىرىمىز تۇراقتالادى. حالىققا جولداۋدا ايتىلعان ءسوزدى جۇرت ءتۇسىندى دەگەن ۇمىتتەمىن. ويتكەنى بىزگە قازىر بىرلىك كەرەك. جاڭا كونستيتۋتسيادا بىرلىگىمىز بەرىك بولۋ ءۇشىن بارلىق مۇمكىندىكتەر قاراستىرىلعان.

كونستيتۋتسيا كۇنىنە ورايلاستىرىلعان حالىققا جولداۋىندا پرەزيدەنت قارۋلى كۇشتەر ۇلكەن وزگەرىس قاجەت ەتەتىنىن ايتتى. سادىر جاپاروۆ وسى رەفورمادا نەگىزگى 2 باعىتقا باسىمدىق بەرىلەتىنىن جەتكىزدى. ياعني اسكەر تاۋ جاعدايىندا ۇرىس جۇرگىزۋگە دايىن ءارى تەحنيكالىق جاعىنان تولىق جاراقتاندىرىلعان ارنايى بولىمشەلەر قاعيداتى بويىنشا ۇيىمداستىرىلۋى قاجەت. سونىمەن قاتار قىرعىزستان حالىق جاساقتارىن قۇرۋدى قولعا الادى. مەملەكەت باسشىسىنىڭ پىكىرىنشە، بۇل جۇيە شەكارا ماڭىنداعى اۋدانداردا تۇراتىن حالىقتىڭ موبيليزاتسيالانۋعا ازىرلىگىن قامتاماسىز ەتىپ، اسكەري قاۋىپ- قاتەرلەر مەن شابۋىلدارعا توتەپ بەرۋگە مۇمكىندىك بەرەدى.

www.24.kz