قازاقستاندا اياق كيىمدى مىندەتتى سيفرلىق تاڭبالاۋ ءتارتىبى ەنگىزىلۋى مۇمكىن

بۇل تۋرالى سيفرلىق ەكونوميكانى دامىتۋ ورتالىعى باسپا ءسوز قىزمەتىنەن ءمالىم بولدى، دەپ حابارلايدى قازاقپارات.

بۇل دەگەنىمىز، بارلىق اياق كيىم وندىرۋشىلەر مەن يمپورتتاۋشىلار ءوز تاۋارلارىن ارنايى ەكى ولشەمدى Data Matrix كودىمەن تاڭبالاۋى كەرەك. بارلىق نورماتيۆتىك- قۇقىقتىق اكتىلەر بەكىتىلگەننەن كەيىن، الەمنىڭ باسقا ەلدەرىنەن، ونىڭ ىشىندە ە ا ە و- دان سيفرلىق تاڭبالاۋسىز تاۋار قازاقستان شەكاراسىنان وتە المايدى. تاڭبالانباعان اياق كيىمنىڭ قالدىقتارىن جىل بويىنا ساتۋعا بولادى. جاڭا ەنگىزىلىم قازاقستاننىڭ اياق كيىم نارىعىنىڭ بارلىق قاتىسۋشىلارىنا - وندىرۋشىلەرگە، يمپورتتاۋشىلارعا جانە بولشەك ساۋدا دۇكەندەرىنە قاتىستى بولادى. اتاپ ايتقاندا، اياق كيىم اينالىمىنا قاتىسۋشىلار تاۋارلاردى تاڭبالاۋ مەن ولاردىڭ قاداعالانۋىنىڭ اقپاراتتىق جۇيەسىندە (ت ت ق ا ج) تىركەلۋگە، سونداي- اق ءوز تاۋارلارىن ۇلتتىق كاتالوگتا تىركەۋگە ءتيىس بولادى. تاڭبالاۋ كودتارى اۆتوماتتى تۇردە ت ت ق ا ج- دا جاسالادى. سودان كەيىن ولاردى Data Matrix-كە تۇرلەندىرۋگە جانە باسىپ شىعارۋ ءۇشىن جۇكتەۋگە بولادى.

«قازىر قازاقستاندا اياق كيىمدى مىندەتتى سيفرلىق تاڭبالاۋدى ەنگىزۋ ءۇشىن نورماتيۆتىك- قۇقىقتىق بازانى دايىنداۋ پروتسەدۋرالارى ءوتىپ جاتىر. ءبىراق ءبىز يمپورتتاۋشىلارعا، وندىرۋشىلەرگە جانە بولشەك ساتۋشىلارعا نارىقتا جۇمىس ىستەۋدىڭ جاڭا ەرەجەلەرىنە قازىر دايىندالۋعا كەڭەس بەرەمىز. بيزنەس سيفرلىق تاڭبالاۋ پروتسەسىن نەعۇرلىم ەرتەرەك باستاسا، بارلىق كەزەڭدەردى زەرتتەۋگە ونىڭ كوپ ۋاقىتى بولادى»، - دەدى سيفرلىق ەكونوميكانى دامىتۋ ورتالىعىنىڭ باس ديرەكتورى بيكەش قۇرمانعاليەۆا.

يمپورتتاۋشىلار تاۋارعا Data Matrix سيفرلىق تاڭبالاۋ كودىن تاۋار مەملەكەتتىك كەدەندىك راسىمدەردەن وتكەنگە دەيىن تاڭبالانۋى قاجەت. ءونىمدى باسقا ەلدەگى وندىرىستە نەمەسە قازاقستان رەسپۋبليكاسىنىڭ اۋماعىنداعى كەدەن قويماسىندا تاڭبالاۋعا بولادى. Data Matrix كودى تىكەلەي اياق كيىمگە، سونداي- اق تاۋارلىق جاپسىرماعا نەمەسە تۇتىنۋشى قاپتاماسىنا ەنگىزىلۋى مۇمكىن. سيفرلىق تاڭبالاۋ نارىقتى ساپاسىز جانە قازاقستان اۋماعىنا زاڭسىز اكەلىنگەن ونىمدەردەن تازارتۋعا كومەكتەسەدى، سونداي- اق وتاندىق وندىرۋشىلەردى دامىتۋعا سەرپىن بەرەدى. تۇتىنۋشى دا ءوز پايداسىن الادى. بىرىنشىدەن، جاڭا سيفرلىق بەلگى ساتىپ الۋشى ءۇشىن ءونىمنىڭ زاڭدىلىعى تۋرالى بەلگى بولادى. ەكىنشىدەن، تۇتىنۋشى Naqty Onim ارنايى ءموبيلدى قوسىمشاسى ارقىلى Data Matrix كودىن سكانەرلەپ، تاۋار تۋرالى تولىق اقپارات الا الادى. ەستەرىڭىزگە سالا كەتەيىك، قازاقستان رەسپۋبليكاسىندا تەمەكى ونىمدەرىن مىندەتتى سيفرلىق تاڭبالاۋ 2020 -جىلعى 1 - قازاننان باستاپ ەنگىزىلدى. 2022 -جىلى فارماتسيەۆتيكالىق پرەپاراتتاردى، الكوگول ونىمدەرىن جانە جەڭىل ونەركاسىپ تاۋارلارىن مىندەتتى سيفرلىق تاڭبالاۋدى ىسكە قوسۋ جوسپارلانىپ وتىر.