بالاعا دارۋمەندى دارىگەر تاعايىنداۋى كەرەك – مامان
«بالالاردىڭ، ءتىپتى، ەرەسەكتەردىڭ اعزاسى ءارتۇرلى دارۋمەنگە ءارتۇرلى جاۋاپ قايتارۋى مۇمكىن. سوندىقتان، ءدال وسى دارۋمەن كوروناۆيرۋستىڭ الدىن الادى، الىپ ءىشۋ كەرەك دەپ ايتا المايمىز، سەبەبى دارۋمەننىڭ ءوزى ءار ادامعا جەكە تاعايىندالۋى ءتيىس. ەگەر بالادا قاننىڭ ازدىعى نەمەسە سوعان بەيىمدىلىك بولسا، دارۋمەن جەتكىلىكسىزدىگىنىڭ بەلگىلەرى بايقالسا مىندەتتى تۇردە جەرگىلىكتى دارىگەرگە بارىپ، ءتيىستى زەرتحانالىق تەكسەرىستەن ءوتىپ، راستالعان جاعدايدا دارۋمەن ءىشۋ تاعايىندالادى»، - دەدى اينۇر ۋاليەۆا.
سونىمەن قاتار، ول ماۋسىمدىق اۋرۋلارمەن اۋرۋحاناعا تۇسەتىن بالالاردىڭ سانى ايتارلىقتاي ازايعانىن اتاپ ءوتتى.
«بالالار اراسىندا كوروناۆيرۋستان ءولىم- ءجىتىم تىركەلگەن جوق. جىلداعىداي ماۋسىمدىق، ينفەكتسيالىق اۋرۋلار، ەنتەروۆيرۋستىق اۋرۋلار، ءجىتى رەسپيراتورلىق ينفەكتسيالار كەزدەسىپ تۇرادى. الايدا، كوروناۆيرۋسقا بايلانىستى ءبىز ءبىر جىلدان بەرى ەپيدەميولوگيالىق شەكتەۋ جاعدايلارىندا ءومىر ءسۇرىپ جاتقاندىقتان قىزىلشا، قىزامىق، جەلشەشەك، كوكجوتەل سياقتى بالالار ينفەكتسيالىق اۋرۋلارىنىڭ كۇرت تومەندەگەنىن بايقادىق»، - دەيدى سپيكەر.
ءسوز سوڭىندا دارىگەر تازا اۋادا سەرۋەندەۋگە، اراقاشىقتىقتى ساقتاۋعا شاقىردى.