دوكتورانت ديسسەرتاتسيا جازباي-اق عىلىمي دارەجەسىن قورعاي الادى

ول ءۇشىن تانىمال عىلىمي جۋرنالدارعا ساپالى ماقالا جازۋى ءتيىس، دەپ حابارلايدى قازاقپارات ءتىلشىسى.

ءبىلىم جانە عىلىم مينيسترلىگىنىڭ اپپارات ماجىلىسىندە ءبىلىم جانە عىلىم سالاسىنداعى باقىلاۋ كوميتەتىنىڭ ءتورايىمى گۇلزات كوبەنوۆا وسىنداي جاڭاشىلدىقتى ءمالىم ەتتى.

«2020 -جىلدىڭ مامىر ايىنان بەرى دوكتورانتتان تالاپ ەتىلەتىن عىلىمي ماقالالار سانى 7 دەن 4 كە قىسقارتىلعان بولاتىن. ەندى عىلىمي ماقالاسى اسا جوعارى بيبليومەتريكالىق كورسەتكىشتەرگە يە بولسا، دوكتورانت 1-2 ماقالانى نەگىزگە الىپ-اق، قورعاۋعا شىعا الادى. بيىل جاڭا بۇيرىق كۇشىنە ەنگەننەن باستاپ، دوكتورانت ديسسەرتاتسيا قورعاۋدىڭ فورماسىن ءوزى تاڭداي الادى. بۇرىنعىداي ديسسەرتاتسيالىق ەڭبەك جازىپ قورعاۋىنا بولادى نەمەسە ۇزدىك جازىلعان ماقالاسىن ديسسەرتاتسيالىق ەڭبەك رەتىندە پايدالانا الادى. ءبىراق مۇنداي ماقالانىڭ بولۋى دوكتورانتتى عىلىمي دارەجەنى قورعاۋدان بوساتپايدى»، - دەدى گۇلزات كوبەنوۆا.

ونىڭ سوزىنشە، كوميتەت عىلىمي ەڭبەكتەر جاريالاۋعا حاقىلى باسىلىمداردىڭ جاڭا تىزبەسىن قالىپتاستىرىپ جاتىر. بىلتىر تىزىمدە 177 جۋرنال بولسا، بيىل 40 باسىلىم تىركەلىپتى. تاعى 15 باسىلىم قارالىپ جاتىر. ال 16 جۋرنال بويىنشا ۇسىنىم حاتى كەرى قايتارىلعان. ونىڭ سەبەبىن كوميتەت باسشىسى جۋرنالداردىڭ تەحنيكالىق تالاپتارعا ساي كەلمەۋىنەن، عىلىمي ەڭبەكتى ونلاين جاريالاۋدىڭ مۇمكىندىگى جوقتىعىنان جانە عىلىمي ەڭبەك جايالاۋ ادەبىن ساقتاماۋدان دەپ ءتۇسىندىردى.

بۇعان دەيىن حابارلاعانىمىزداي، گۇلزات كوبەنوۆا PhD دارەجەسىن قورعاۋ كانديداتتىق ديسسەرتاتسيا دەڭگەيىندە قالىپ قويعانىن ءمالىم ەتكەن بولاتىن. اتالمىش شارادا مينيستر اسحات ايماعامبەتوۆ عىلىمي دارەجە قورعاۋشىلاردان ديسسەرتاتسيانىڭ قازاق تىلىندەگى نۇسقاسى تالاپ ەتىلەتىنىن ايتقان ەدى.