امەريكالىقتار اسىراپ العان قازاق بالاسى تۋعان اتا-اناسىن ىزدەيدى

بۇل اقپارات Facebook جەلىسىندەگى «Kazakh American Association» توبىندا پايدا بولدى.

نوي ساك مارشالل قازاقستاندا دۇنيەگە كەلگەن جانە ونى امەريكالىقتار ەكى جاسىندا اسىراپ العان.

«مەنىڭ ەسىمىم نوي (سۇلتان ءۇمىت ۇلى كاريموۆ). مەن 1999-جىلى قاراشا ايىندا الماتىدا دۇنيەگە كەلدىم. شامامەن ەكى جارىم جىلدان كەيىن مەنى الماتى قالالىق 2№ بالالار ۇيىنەن اسىراپ الدى»، - دەپ جازدى ول.

اناسىنىڭ ەسىمى بەلگىلى، ونىڭ اتى - كاريموۆا ءۇمىت قالكەن قىزى، ال اكەسى - كاريموۆ ءۇمىت ساكەن ۇلى.

ونىڭ ايتۋىنشا، كاريموۆا ءۇمىت قالكەن قىزى ەسىمدى ايەلدى الماتىدان تابا الماعان. ول ءوزىنىڭ تۋىستارى تۋرالى كوبىرەك بىلگىسى كەلەدى.

«مەن مەكتەپتە كوپتەگەن تىلدەردى، سونىڭ ىشىندە ورىس ءتىلىن وقىدىم. قازاق ءتىلىن وڭاي ۇيرەنۋ ءۇشىن تۇرىك ءتىلىن ۇيرەنىپ ءجۇرمىن»، - دەپ جازدى نوي.

قازاقپارات رەداكسياسى قالالىق اكىمدىككە نويدىڭ اتا-اناسىن تابۋعا كومەكتەسۋدى سۇراپ، جۇگىنگەن ەدى.

«وكىنىشكە وراي، اكىمدىك ادامداردى ىزدەۋمەن اينالىسپايدى. مۇمكىن الماتى قالالىق پوليتسيا دەپارتامەنتى كومەكتەسەر»، - دەپ جاۋاپ بەردى اكىمدىكتىڭ باسپا ءسوز قىزمەتىنەن.

رەداكسيا قالالىق پوليتسيا دەپارتامەنتىنەن جاۋاپ كۇتۋدە.

ەسكە سالايىق، بىلتىرعى مامىر ايىندا ا ق ش ازاماتتارى اسىراپ العان قازاق بالاسى مارات توقتار ۇلى ورازعاليەۆ (قازىرگى ەسىمى - تەودور ۋولتون) الەۋمەتتىك جەلىلەر ارقىلى وسكەمەن قالاسىنداعى تۋعان-تۋىستارىنا ىزدەۋ سالعان بولاتىن.

ش ق و ءبىلىم باسقارماسىنىڭ قورعانشىلىق، قامقورشىلىق جانە ينتەرنات ۇيىمدارى ءبولىمىنىڭ ماماندارى ىزدەستىرۋ جۇمىستارىن جۇرگىزىپ، ەكى كۇننەن كەيىن تەودور ۋولتوننىڭ تۋعان اعاسىن تاۋىپ بەردى. كەيىننەن اعايىندىلاردى ءبىر-بىرىمەن بايلانىستىردى.