جەر كوميسسياسى: ا ش م جانىنان اۋىلدىق اۋماقتاردى دامىتۋ كوميتەتىن قۇرۋ ۇسىنىلدى
كوميسسيانىڭ ەكونوميكالىق ماسەلەلەر جونىندەگى جۇمىس توبى سالىق كودەكسىنە اۋىلشارۋاشىلىق جەرلەرىنە تۇسكەن سالىقتاردى ءتورتىنشى دەڭگەيدەگى بيۋجەتكە اۋدارۋ بولىگىندە وزگەرىستەر ەنگىزۋ ماسەلەسىن كوميسسيانىڭ قاراۋىنان الىپ تاستاۋدى ۇسىندى.
«بۇل سۇراقتى كۇن تارتىبىنەن الىپ تاستاۋدى ۇسىنامىز. ويتكەنى اتالعان ماسەلەگە قاتىستى مەملەكەت باسشىسىنىڭ تاپسىرماسىنا سايكەس، ءتيىستى زاڭ جوباسى قازىرگى تاڭدا ماجىلىستە قارالىپ جاتىر»، - دەدى جۇمىس توبىنىڭ باسشىسى اقىلبەك كۇرىشبايەۆ.
ءوز سوزىندە ا. كۇرىشبايەۆ اگرارلىق ەلدەردە اۋىلدىق اۋماقتاردىڭ دامۋى اۋىل شارۋاشىلىعىنا جاۋاپتى مينيسترلىكتىڭ قۇزىرىنداعى ماسەلە ەكەنىن ەسكە سالدى.
«تاعى ءبىر ماسەلە - اۋىلدىق اۋماقتاردى دامىتۋ ماسەلەلەرىن ۇيلەستىرۋ ءۇشىن اۋىل شارۋاشىلىعى مينيسترلىگىنىڭ جانىنان اۋىلدىق اۋماقتاردى باسقارۋدى قۇرۋ كوميتەتىن قۇرۋ. بۇل سۇراق تىكەلەي جەر رەفورماسىنا ءتيىستى بولماسا دا، اۋىلدىق ەلدى مەكەندەردى دامىتۋعا بايلانىستى. وزدەرىڭىز بىلەسىزدەر، اۋىلداعى جاعداي شىنىندا دا وڭاي ەمەس. جۇمىسسىزدىق كوبەيۋدە، ءبىراز ينفراقۇرىلىمدىق ماسەلەلەر شەشىلمەي تۇر. سوندىقتان اۋىلدىق اۋماقتاردى دامىتۋعا باعىتتالعان ارنايى «اۋىل - ەل بەسىگى» ۇلتتىق جوباسىن قابىلداپ، ا ش م جانىنان ارنايى كوميتەت اشقانىمىز دۇرىس بولار ەدى. بىلتىر پارلامەنتتىك تىڭداۋدا دا پارلامەنت سەناتى ۇكىمەتكە وسىنداي ۇسىنىس بەرگەن. كوپتەگەن ەۋروپا مەملەكەتتەرىندە، كانادا، اۋستراليا، رەسەي، بەلارۋس جانە تاعى باسقا اگرارلىق ەلدەردە اۋىلدىق اۋماقتار ماسەلەلەرى اۋىل شارۋاشىلىعى مينيسترلىگىنىڭ قۇزىرىندا رەتتەلەدى. ويتكەنى اگرارلىق ءوندىرىس پەن اۋىلدىق اۋماقتاردى دامىتۋ ءبىرتۇتاس دۇنيەنىڭ ەكى بولىگى»، - دەدى كوميسسيا مۇشەسى.
ونىڭ ايتۋىنشا، بۇل ۇسىنىستى ەكونوميكالىق ماسەلەلەر جونىندەگى جۇمىس توبىنىڭ مۇشەلەرى تولىقتاي قولداعان.
اتالمىش شارادا اقىلبەك كۇرىشبايەۆ حالىققا جايىلىمدىق جەر بەرۋدە بيۋروكراتيا وتە كوپ ەكەنىن ايتقان بولاتىن.
وسى اپتادا ءماجىلىس جەردى شەتەلدىكتەرگە بەرۋگە ءبىرجولا تىيىم سالۋدى كوزدەيتىن زاڭ جوباسىن ماقۇلدادى.
پرەزيدەنتتىڭ كومەكشىسى ەرلان قارين وسى زاڭ جوباسىنىڭ ماقۇلدانۋى تۋرالى پىكىر بىلدىرگەنىن جازعان بولاتىنبىز.