ورالدا دۇكەن مەن اقشا ايىرباستاۋ پۋنكتىن توناعاندار ۇستالدى

ورال قالاسى پوليتسيا باسقارماسى باستىعىنىڭ ورىنباسارى نۇرلان بيسەنوۆ ءمالىم ەتكەنىندەي، ۇيىمداسقان قىلمىستىق توپتىڭ ەكى مۇشەسى اقتوبەلىك بولسا، بىرەۋى - ورالدىق تۇرعىن.

قازىرگى تاڭدا كۇدىكتىلەرگە قاتىستى ق ر ق ك 192-بابى 2-بولىگىنە (قاراقشىلىق)، 188-بابى 3-بولىگى (ۇرلىق) جانە 191-بابى 2-بولىگىنە (كىسى توناۋ) سايكەس قىلمىستىق ءىس قوزعالىپ، ءبىرقاتار ساراپتاما تاعايىندالدى. ولاردىڭ باسقا دا قىلمىستارعا قاتىستىلىعى تەكسەرىلۋدە.

ن. بيسەنوۆتىڭ سوزىنە قاراعاندا، بيىلعى 21- اقپاندا قارا بەتپەردە كيگەن بەلگىسىز بىرەۋلەر دەركول اۋىلىنداعى «ترانزيت» دۇكەنىنە قاراقشىلىق شابۋىل جاساعان بولاتىن. ساتۋشىنى تاپانشاعا ۇقساس زاتپەن قورقىتىپ، كاسسادان 75 مىڭ تەڭگەنى الىپ كەتكەن. ونىمەن تىنباي، وسى عيماراتتا ورنالاسقان اقشا ايىرباستاۋ پۋنكتىنە كىرىپ، 1,5 ميلليون تەڭگە مەن نوۋتبۋكتى جىمقىرىپ، بوي تاسالاعان.

- قىلمىستىق توپ ءوز ارەكەتىن الدىن الا جوسپارلاپ، اقشا ايىرباستاۋ پۋنكتىنىڭ كاسسيرىن جۇمىسقا بارا جاتقاندا، ۇرلاپ اكەتكەن. سونىڭ كىلتىمەن اقشا ايىرباستاۋ پۋنكتى مەن سەيفتى اشقان. كاسسير مەن ساتۋشىنى بايلاپ تاستاپ، ماشينادا ۇستاعان.

پوليتسيا دەپارتامەنتى باستىعىنىڭ بۇيرىعىمەن ارنايى جەدەل تەرگەۋ توبى قۇرىلدى. جەدەل ىزدەستىرۋ جۇمىستارى بارىسىندا اقتوبەدەن ەكى كۇدىكتى ۇستالىپ، ورالعا جەتكىزىلدى. بىرەۋى ورالدان قولعا ءتۇستى. ولار 1979، 1981 جانە 1984-جىلعىلار بولىپ شىقتى، - دەيدى ن. بيسەنوۆ.

كۇدىكتىلەردىڭ ءبىرى بۇعان دەيىن ادام ولىمىنە اپارىپ سوققان اۋىر دەنە جاراقاتتارىن سالعانى ءۇشىن قىلمىستىق جاۋاپكەرشىلىككە تارتىلعان.

تەرگەۋ بارىسىندا زاتتاي ايعاقتار تاركىلەندى. قاراقشىلىق شابۋىل كەزىندە ولاردىڭ تاپانشا مۋلياجىن پايدالانعانى انىقتالدى. ال قارجىنى ءوز قاجەتتەرىنە جۇمساپ ۇلگەرگەن.

ەسكە سالا كەتەيىك، بۇدان بۇرىن ورالدا تاراز تۇرعىنى 21 كەلى ەسىرتكىمەن ۇستالعانىن جازعان بولاتىنبىز.