ساياسي قۋعىن- سۇرگىن قۇرباندارىن اقتاۋ باعىتىندا جۇمىس ىستەيتىن عالىمدار بەكىتىلدى

«ءبىلىم جانە عىلىم مينيسترلىگى وسى مەملەكەتتىك كوميسسياسىنىڭ جۇمىس ورگانى رەتىندە بەكىتىلدى. سوندىقتان الدىمىزدا تۇرعان ەڭ باستى ماسەلەنىڭ ءبىرى - عىلىمي الەۋەتىمىزدى، عالىمدارىمىزدى وسى جۇمىسقا تارتۋ. وسى ماقساتتا اكادەميكتەر، عىلىمي زەرتتەۋ ينستيتۋتتارىنىڭ جەتەكشى عالىمدارى، ەلىمىزدىڭ وڭىرلەرىندە ورنالاسقان جوعارى وقۋ ورىندارىنىڭ قىزمەتكەرلەرى جۇمىلدىرىلىپ وتىر. نەگىزى، 11 باعىت بويىنشا جۇمىس توپتارىن ۇيىمداستىردىق. بۇل 11 توپتا 57 عالىم جۇمىس ىستەپ جاتىر»، - دەدى مينيستر ورتالىق كوممۋنيكاتسيالار قىزمەتىندە.

ونىڭ ايتۋىنشا، اتالعان عالىمدار ءبىرازدان بەرى وسى پروبلەمامەن اينالىسىپ كەلە جاتىر.

«عالىمدار ءۇشىن ءتيىستى جاعداي جاساپ جاتىرمىز. ۋنيۆەرسيتەتتەردە ىستەيتىن عالىمداردى بوگدە جۇمىستان بوساتىپ، تەك قانا بەلگىلەنگەن مىندەتتەرگە كىرىسىپ وتىر. ايماقتاردا دا جۇمىس توپتارى، كوميسسيالار قۇرىلدى. بۇل كوميسسيالارعا وبلىس اكىمدەرىنىڭ ورىنباسارلارى، دەپۋتاتتار، ولكەتانۋشىلار، عالىمدار، قوعام بەلسەندىلەرى قاتىسىپ جاتىر»، - دەدى ا. ايماعامبەتوۆ.

سونىمەن قاتار ول بۇل جۇمىستاردىڭ اياسىندا ادىستەمەلىك ماسەلەلەردى انىقتاۋ وتە ماڭىزدى ەكەنىن اتاپ ءوتتى.

«سوندىقتان عالىمدارىمىز ارنايى ادىستەمەلىك ماسەلەگە توقتالىپ، قارالاتىن پروبلەمالاردى انىقتاپ، ءتيىستى جۇمىستاردى اياقتادى. قاجەتتى انىقتامالار مەن كىتاپشالار جاسالىپ، تاراتىلدى. ەڭ باستىسى، بۇل باعىتتاعى قادامدار عىلىمي نەگىزدە، ناقتى مۇراعاتتارعا سۇيەنە وتىرىپ جاسالۋى كەرەك. عالىمدارعا مۇراعاتتاردا جۇمىس ىستەۋ ءۇشىن رۇقساتناما كەرەك بولدى، وسىعان وراي ءتيىستى ءىس- شارالار ۇيىمداستىرىلدى»، - دەدى مينيستر.

«كەشە مەملەكەتتىك كوميسسيانىڭ 2-وتىرىسى ءوتتى. كۇن تارتىبىندە جۇرگەن ءبىراز ماسەلە تالقىلاندى. ونىڭ ىشىندە ايماقتاعى كوميسسيالاردىڭ جۇمىسىنا قاتىستى ماسەلەلەر پىسىقتالدى. مەملەكەتتىك كوميسسيا قىزمەتىن قامتاماسىز ەتۋ ماقساتىندا «قازاقستاندا 20-عاسىردىڭ 20-50 -جىلدارىنداعى جاپپاي ساياسي قۋعىن- سۇرگىن جانە اقتاۋ پروتسەسى» ءبىرىڭعاي دەرەكتەر بازاسىن قالىپتاستىرۋ تاقىرىبىندا ارنايى عىلىمي باعدارلاما ازىرلەندى. ول باعدارلاما دايىن. قارجى ماسەلەسى تولىقتاي شەشىلدى. كوميسسيانىڭ بۇكىل جۇمىسى، زەرتتەۋشىلەرىمىزدىڭ ءبارى وسى عىلىمي باعدارلاما نەگىزىندە ارى قاراي جۇمىس ىستەيدى. باعدارلامانى كەلەسى اپتادا جوعارى عىلىمي- تەحنيكالىق كەڭەستىڭ وتىرىسىندا دا قاراستىراتىن بولامىز. كەڭەس قورىتىندىسى بويىنشا باعدارلاماعا قاتىستى كۇن تارتىبىندەگى ماسەلەلەر بولسا، وندا قوسىمشا قابىلدايمىز»، - دەدى ەرالى توعجانوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

مەملەكەتتىك كوميسسيانىڭ جۇمىس باعىتتارى بويىنشا 11 جۇمىس توبى قۇرىلدى. بۇل توپتاردىڭ جۇمىسىنا ەلىمىزدەگى جەتەكشى عىلىمي- زەرتتەۋ ينستيتۋتتارىنىڭ، ج و و- لاردىڭ 57 عىلىمي قىزمەتكەرى جۇمىلدىرىلدى.

«بارلىق مەملەكەتتىك ورگاندارمەن كوميسسيانىڭ جۇمىس توپتارىنىڭ بىرلەسكەن جۇمىسىن قامتاماسىز ەتۋ ماقساتىندا ارناۋلى جوبالىق كەڭسە قۇرىلىپ، قىزمەتىن باستاپ كەتتى. كەڭسە قۇرامىندا 11 مەملەكەتتىك ورگاننىڭ وكىلدەرى، 6 عالىم بار. ولار جۇمىسىن ىستەپ جاتىر. بارلىق وڭىردە اكىمدەردىڭ ورىنباسارلارى باسقاراتىن ارناۋلى وڭىرلىك كوميسسيالار قۇرىلدى. ولاردىڭ دا قۇرامىنا جەرگىلىكتى عالىمدار، قوعام وكىلدەرى، ءماسليحات دەپۋتاتتارى كىرەدى. جەرگىلىك كوميسسيالار ايماقتىق مۇراعاتتارعا قاتىستى جۇمىستاردى اتقارادى»، - دەدى ۇكىمەت باسشىسىنىڭ ورىنباسارى.

اۆتور: رۋسلان عابباسوۆ