كوروناۆيرۋس: ءارتۇرلى ۆاكسينا سالدىرۋعا بولا ما

None
None
نۇر-سۇلتان. قازاقپارات - قاراعاندى مەديتسينا ۋنيۆەرسيتەتىنىڭ پرورەكتورى، مەديتسينا عىلىمدارىنىڭ دوكتورى، پروفەسسور باقىت كوشەروۆا ءتۇرلى ۆاكسينالاردى سالۋعا قاتىستى تۇسىنىك بەردى، دەپ حابارلايدى قازاقپارات ءتىلشىسى.

«شىن مانىندە تەك ءبىر ۆاكسينانى سالدىرعان دۇرىس. وسى ەكپەلەردىڭ نەگىزگى ماقساتى ۆيرۋستىڭ S اقۋىزىنا يممۋنيتەت قالىپتاستىرۋعا نەگىزدەلگەن. بۇل اقۋىز كوروناۆيرۋس ينفەكسياسىنىڭ اۋىر سالدارىنا الىپ كەلەدى. شىعارىلىپ جاتقان ۆاكسينالاردىڭ بارلىعى ۆەكتورلىق ساناتىنا جاتادى، قۇرامىندا S اقۋىزى بار. يناكتيۆتى ۆاكسينالار دا S اقۋىزىن قامتيدى. ەڭ باستىسى، اعزادا اتالعان اقۋىزعا انتيدەنەلەر قالىپتاستىرۋ كەرەك. سوندىقتان بىرنەشە ۆاكسينانى ەكتىرۋدىڭ قاجەتى جوق»، - دەدى عالىم. ب. كوشەروۆا قازىرگى كەزدە ءتيىستى زەرتتەۋلەر ءجۇرىپ جاتقانىن ايتتى.

«رەسەيلىك ۆاكسيناعا توقتالساق، انتيدەنەلەر قالىپتاساتىندىعى تۋرالى زەرتتەۋلەر بار. انتيدەنەلەر سيركۋلياتسياسىنىڭ ۇزاقتىعى بۇگىندە 6 ايدان كەم ەمەس بولىپ تۇر. دەگەنمەن زەرتتەۋلەر جالعاسىپ جاتىر. الداعى ۋاقىتتا ونىڭ مەرزىمى ۇزارۋى مۇمكىن. ءالى دە از ۋاقىت ءوتتى، سوندىقتان ۆاكسينالاۋدان كەيىن يممۋنيتەت، انتيدەنەلەر 1,2 جىل جانە ودان كوپ ۋاقىت ساقتالادى دەپ ايتۋ ەرتەرەك. زەرتتەۋلەردىڭ قورىتىندىسى بويىنشا ءتيىستى ناتيجەگە قول جەتكىزەمىز دەپ سانايمىن»، - دەدى عالىم.

اۆتور: رۋسلان عابباسوۆ

سوڭعى جاڭالىقتار