قازاقستاندىقتاردىڭ قانداي گازەت-جۋرنالدى كوبىرەك وقيتىنى بەلگىلى بولدى

«2021 -جىلدىڭ ءبىرىنشى توقسانى قورىتىندىسى بويىنشا «قازپوشتا» ا ق ارقىلى قازاقستاندا گازەتتەر مەن جۋرنالدارعا جازىلۋدىڭ جالپى كولەمى 55,6 ميلليون دانانى قۇرادى. رەسپۋبليكالىق گازەتتەردىڭ ۇزدىك بەستىگىنە «ەگەمەن قازاقستان»، «كازاحستانسكايا پراۆدا»، «پوليتسيا KZ»، «قازاقستان تەمىرجولشىسى» جانە «ۇيعىر اۆازي» باسىلىمدارى كىردى. ايماقتىق كوشباسشىلار اراسىندا «جەتىسۋ»، «اقتوبە»، «وڭتۇستىك قازاقستان»، «Аq Jol «، «ورتالىق قازاقستان» گازەتتەرى بار»، - دەلىنگەن «قازپوشتا» ا ق باسپا ءسوز حابارلاماسىندا.

باسپا ءسوز حابارلاماسىندا جازىلعانداي، ەل بويىنشا بارلىعى 170 رەسپۋبليكالىق جانە 543 ايماقتىق گازەت جازىلىم بويىنشا تاراتىلادى. جازىلۋدىڭ جالپى كولەمىندەگى رەسپۋبليكالىق باسىلىمداردىڭ ۇلەسى %44، وڭىرلىك باسىلىمداردىڭ ۇلەسى %54 قۇرادى. تيراجدىڭ %2 ى حالىقارالىق مەرزىمدى باسىلىمدارعا تيەسىلى.

«گازەتتەر مەن جۋرنالدارعا جازىلۋ اۋىلداردا كوپ تىركەلگەن. جازىلۋدىڭ جالپى كولەمىندە ونىڭ ۇلەسى %71 قۇرايدى. اۋىل تۇرعىندارى وبلىستىق، قالالىق جانە اۋداندىق باسىلىمدارعا جازىلعاندى (جالپى تيراجدىڭ %58 ى) ءجون كورەدى»، - دەلىنگەن حابارلامادا.

جازىلۋ بويىنشا قازاقستاننىڭ وڭىرلەرى اراسىندا الماتى، اقتوبە، قاراعاندى جانە جامبىل وبلىستارى كوش باستاپ تۇر.

«2020 -جىلدىڭ قورىتىندىسى بويىنشا جازىلۋدىڭ جالپى كولەمى 90,3 ميلليون دانانى قۇرادى. بيىلعى جىلدىڭ ەكىنشى جارتىجىلدىعىنا جازىلۋ 5-ءساۋىر كۇنى باستالدى. جىل سوڭىندا كورسەتكىشتەر %25-30 وسەدى، ءبىراق تۇتاستاي العاندا وتكەن جىلدىڭ كورسەتكىشىنەن اسپايدى. ءبىز ەلەكتروندى باسىلىمدارعا كوشۋ - جالپى الەمدىك ترەند ەكەنىن تۇسىنەمىز. ونى قازاقستاندىق ستاتيستيكا دا راستايدى»، - دەدى «قازپوشتا» ا ق «پوشتالىق سەرۆيس» فيليالى ديرەكتورى نۇرجان جابايەۆ.