قازاقستان مەن تۇركيا بىرلەسىپ تاريحي تەلەحيكايا تۇسىرەدى

بۇل تۋرالى اقپارات جانە قوعامدىق دامۋ ءمينيسترى ايدا بالايەۆانىڭ تۇركيانىڭ مەملەكەتتىك TRT تەلەراديوكورپوراتسياسىنىڭ باسشىلىعىمەن بولعان كەزدەسۋىندە ايتىلدى، دەپ حابارلايدى قازاقپارات حابار 24 تەلەارناسىنا سىلتەمە جاساپ.

اقجولتاي حابار قازاقستان پرەزيدەنتى قاسىم-جومارت توقايەۆتىڭ تۇركى كەڭەسى بەيرەسمي سامميتىندە ورتاق مادەني- اعارتۋشىلىق كەڭىستىك قالىپتاستىرۋ قاجەت دەگەن تاپسىرماسىنا سايكەس جۇزەگە اسپاق.

«قازاقستان مەن تۇركيا بىرلەسىپ، تاريحي فيلم مەن تەلەحيكايا تۇسىرمەك. بۇل جوبانى ەلىمىزدىڭ جانە تۇرىكتىڭ مەملەكەتتىك تەلەارنالارى مەن جەتەكشى ماماندارى جۇزەگە اسىرماقشى. كورەرمەنگە قىسقا ۋاقىتتا جول تارتاتىن تۋىندى قازاقستان مەن تۇركيادا تۇسىرىلەدى. مەنىڭ قازىر اياق باسىپ تۇرعان جەرىم رەيتينگى جوعارى «سەلجۋك مەملەكەتىنىڭ جاندانۋى» تەلەحيكاياسىنىڭ ءتۇسىرىلىم الاڭى. تاپ وسى سەكىلدى ءتۇسىرىلىم پاۆيلوندارىن الداعى ۋاقىتتا ىستامبۇل مەن قازاق ەلىنەن كورۋگە بولادى»، - دەدى ءتىلشى مەرۋەرت قاناعات.

تۇركياعا جۇمىس ساپارىمەن كەلگەن مينيستر ايدا بالايەۆا ىستامبۇلدا ورنالاسقان TRT تەلەراديوكورپوراتسياسىنىڭ كينوستۋديا قالاشىعىن ارالادى. ءتۇسىرىلىم مەكەندەرىن ءوز كوزىمەن كورگەن مينيستر، سالا ماماندارىنان جان-جاقتى اقپارات الىپ، ورتاق تەلەحيكايا مەن فيلم ءتۇسىرۋ بويىنشا پىكىر الماستى. ەكى ەلگە ورتاق تۇلعالار جايلى ءسوز قوزعاپ، ساپالى جوبالاردى جۇزەگە اسىرۋ قاجەتتىگى ايتىلدى. تۇرىكتىڭ بەلگىلى پروديۋسەرى ەمرە كونۋك، بىرلەسىپ جۇمىس ىستەۋگە دايىن ەكەنىن جەتكىزىپ، قازاقستاننىڭ تۇمسا تابيعاتىندا تاريحي فيلمدەردى تۇسىرۋگە قىزىعۋشىلىق ءبىلدىردى.

«الداعى ۋاقىتتا 6 بولىمنەن تۇراتىن الىپ- ارسلان تاريحي تەلەحيكاياسىن تۇسىرمەكپىز. تۋىندىداعى سوعىس الاڭدارى مەن جازىق دالا كورىنىستەرىن قازاقستاندا ءتۇسىرۋدى جوسپارلاپ وتىرمىز. بۇگىنگى كەزدەسۋدە مينيستر ايدا بالايەۆامەن وسى جوبانى جان- جاقتى تالقىلادىق. سونىمەن قاتار قورقىت اتا جايلى فيلم تۇسىرەتىن كەز كەلدى. تورتكۇل دۇنيە ۇلى تۇلعالارىمىزدى تانۋى ءتيىس. ۇرپاقتارى رەتىندە بۇل ءبىزدىڭ بورىشىمىز»، - پروديۋسەر ەمرە كونۋك.

حالىقارالىق «TRT» كينوستۋديا قالاشىعى شامامەن 50 گەكتارعا جۋىق الاڭدا ورنالاسقان. ونىڭ 12 گەكتارى ورماندى القاپ بولسا، قالعان تەرريتورياسىنا تاريحي قامالدار مەن شاھار تۇرعىزىلعان. قازىر مۇندا بىرنەشە تاريحي سەريالداردىڭ ءتۇسىرىلىم توبى جۇمىس ىستەپ ءجۇر. ولاردىڭ اراسىنان ەلىمىزدىڭ كاسكادەرلەرىن كەزدەستىرىپ، دومبىرانىڭ ءۇنىن تىڭداۋعا بولادى.

ايتا كەتەرلىگى، سوڭعى جىلداردا قازاقتىڭ دومبىراسى جەرگىلىكتى كينوتۋىندىلاردىڭ ساۋنترەكتەرىندە ءجيى ەستىلىپ ءجۇر.

«حالىقارالىق «TRT» كينوستۋديا قالاشىعىنىڭ قۇرىلىسىن ءبىر جىل بۇرىن باستادىق. بۇگىن ءبىر بولىگىن قازاقستاندىق دەلەگاتسيامەن ارالاپ، ورتاق جوبانى جۇزەگە اسىرۋ جونىندە پىكىر الماستىق. قازىردە قازاقستاندىق «Nomad» كاسكادەرلەرى مەن «حاسساق» ەتنو- فولكلورلىق انسامبلىمەن جۇمىس ىستەيمىز. تاريحىمىز ءبىر. سوندىقتان ورتاق جوبانى جۇزەگە اسىرساق دەپ ارماندايمىز»، TRT ءتۇسىرىلىم قالاشىعىنىڭ ديرەكتورى ياحيا تايپ ايدەنيز. تۇركيا بۇكىل الەم بويىنشا تەلەحيكايا ەكسپورىندا ەكىنشى ورىندا تۇر. 2018 -جىلى شەتەلگە ساتىلعان تۇرىك تۋىندىلارىنىڭ قۇنى 500 ميلليون دوللار بولدى. تەك قانا «سۇلەيمان سۇلتان» تەلەحيكاياسىن 700 ميلليوننان استام كورەرمەن تاماشالاعان. سوندا دا الىستاعى اعايىن بۇل كورسەتكىشتى ەسەلەۋگە نيەتتى. سالا ماماندارى كينويندۋستريادان تابىستى 2023 -جىلى 1 ميلليون دوللارعا جەتكىزۋگە بەل بۋىپ وتىر.