ديماشتىڭ تاعى ءبىر ءانى سيفرلىق پلاتفورماعا شىقتى

جاڭا ترەكتىڭ كوپشىلىككە قولجەتىمدى بولاتىنىن ءانشىنىڭ ءوزى بىرنەشە كۇن بۇرىن Instagram پاراقشاسىندا جاريالاعان بولاتىن.

«قۇرمەتتى دوستار، جاقىن ارادا، ناقتىراق ايتقاندا 2 -ساۋىردە، بارلىق سيفرلىق پلاتفورمالاردا ورنالاسقان Dimash Qudaibergen اتتى رەسمي اككاۋنتتان مەنىڭ «Dimash Digital Show» العاشقى ونلاين- كونسەرتىمدە ورىندالعان «Be With Me « اتتى ءانىمدى تىڭداي الاسىزدار»، - دەي كەلىپ، ءوز جانكۇيەرلەرىنە العىس بىلدىرگەن.

Dimashnews پورتالىنىڭ جازۋىنشا، «Be With Me « ءانىن ديماشتىڭ ءوزى ارلەگەن.

اۋەلى دەمونۇسقاسىن نوبايلاپ، كەيىن وعان قۇرمانعازى اتىنداعى قازاق مەملەكەتتىك حالىق اسپاپتارى وركەسترىنىڭ باس ديريجەرى ابىلاي تىلەپبەرگەنوۆ ويناعان دومبىرا پارتياسىن قوسقىزعان. ديماش اندەرىنىڭ تۇراقتى وڭدەۋشىسى، ساۋند- پروديۋسەر ەرلان بەكشۋرين دەموجازبانىڭ مانەرىن وزگەرتىپ، باستاپقى قۇرىلىمى مەن باس اۋەنىن ساقتاي وتىرىپ، قوسىمشا ىرعاقتار قوسىپتى. وسىدان كەيىن ول ءادىلجان تولىقپايەۆتى شاقىرىپ، دومبىرا پارتياسىن قايتا جازىپ شىققان. بۇل تاندەمگە كومپوزيتور رەنات گايسين قوسىلىپ، كلاۆينەت پەن ۇرمەلى اسپاپتار پارتياسىن كىرگىزگەن. ماسكەۋلىك مۋزىكانت مارسەل حاكيموۆ باس پارتياسىن قايتا جازىپ شىعادى.

ديماشتىڭ داۋىسىن دىبىس رەجيسسەرى داستان مەرعالييەۆ جازعان. ال اقتىق جازبا كەزىندە ديماشقا بەك- ۆوكاليستەر راسۋل ۋسمانوۆ، دجوردان اراكەليان، زارينا بوجاكوۆا قوسىلعان. وسىنشا ەڭبەكتىڭ ءبارىن ەرلان بەكشۋرين DimashAli ستۋدياسىندا «ءپىسىرىپ» ، تولىققاندى ترەككە اينالدىردى. ساۋند- پروديۋسەردىڭ ايتۋىنشا، ءان ءماتىنىن دجوردان اراكەليان مەن داۋرەن شامۇراتوۆ جازعان. دجوردان نەگىزگى اعىلشىنشا ماتىندە جازسا، داۋرەن قازاقشا رەپ ءماتىنىن شىعاردى.

«Be With Me « ءانى العاش رەت 2021 -جىلعى 17 ق- اڭتاردا امەريكاندىق TIXR ستريمينگ پلاتفورماسىنداعى «Dimash Digital Show» ونلاين- كونتسەرتىندە شىرقالعان ەدى. Dimash DIGITAL SHOW ديماشتىڭ كوروناۆيرۋستىق پاندەميا باستالعاننان بەرگى العاشقى جاھاندىق قويىلىمى بولدى.