13:30, 02 - ءساۋىر 2021 | GMT +6
بيىلعى ءپىتىر ساداقانىڭ مولشەرى بەلگىلەندى
نۇر-سۇلتان. قازاقپارات - ەلوردادا باس ءمۇفتي ناۋرىزباي قاجى تاعان ۇلىنىڭ توراعالىعىمەن وتكەن قازاقستان مۇسىلماندارى ءدىني باسقارماسىنىڭ كەڭەيتىلگەن ءتورالقا ماجىلىسىندە بيىلعى ءپىتىر ساداقاسىنىڭ، زەكەت پەن ءپىديانىڭ مولشەرى انىقتالدى، دەپ حابارلايدى قازاقپارات muftyat.kz-كە سىلتەمە جاساپ.
بيىل ءپىتىر مولشەرى 420 تەڭگە بولىپ بەلگىلەندى. ءپىتىر ساداقانىڭ مولشەرى 2 كەلى ۇننىڭ ورتاشا باعاسىمەن ەسەپتەلدى. ال ۇننىڭ باعاسى ق م د ب- نىڭ قالا جانە وبلىس وكىلدىكتەرىنىڭ بەرگەن مالىمەتى نەگىزىندە انىقتالدى.
ق م د ب ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆ تاراۋىق نامازىندا سانيتارلىق تالاپتاردى ساقتاي وتىرىپ قىسقا سۇرەلەر وقۋ، اۋا رايى قولايلى ايماقتاردا مەشىت اۋلاسىندا وتكىزۋ، رامازان ايىندا قۇران حاتىم جاسايتىن توپتار قۇرىپ، جاماعاتتى ساۋاپتى ىستەرگە جۇمىلدىرۋ جاعىنا باسىمدىق بەرۋ تۋرالى ايتتى.
سونداي-اق باتىرجان مانسۇروۆ قاسيەتتى ايدا ونلاين جانە تىكەلەي ەفيردە بىرنەشە جوبا ۇسىنىلاتىنىن جەتكىزدى.
