وزبەكستانعا قازاقستاننىڭ تەست جۇيەسى ەنگىزىلۋى مۇمكىن - شەتەلدەگى قازاق ءتىلدى ب ا ق- قا شولۋ

موڭعوليا سىرتقى ىستەر ءمينيسترى قازاقستان ەلشىسىن قابىلدادى – Kaznews

2021 -جىلعى 25 -ناۋرىزدا موڭعوليانىڭ سىرتقى ىستەر ءمينيسترى ءباتمونحيين باتتسەتسەگ قازاقستان رەسپۋبليكاسىنىڭ موڭعولياداعى توتەنشە جانە وكىلەتتى ەلشىسى ج. ادىلبايەۆتى قابىلدادى، دەپ حابارلايدى Kaznews اقپاراتتىق پورتالى.

كەزدەسۋ بارىسىندا ب. باتتسەسەگ قازاقستان حالقىن تىرشىلىك اتاۋلى جاندانىپ، تابيعات قايتا تۇلەيتىن شاق پەن جاڭا ومىرگە ۇمتىلىستىڭ نىشانى بولىپ تابىلاتىن كوكتەمگى ناۋرىز مەيرامىمەن قۇتتىقتادى. جاڭا تاعايىندالعان موڭعوليانىڭ سىرتقى ىستەر ءمينيسترى قازاقستاندىق ارىپتەسى م. تىلەۋبەردىگە قۇتتىقتاۋى ءۇشىن ريزاشىلىعىن بىلدىرگەن.

«موڭعوليانىڭ سىرتقى ىستەر ءمينيسترى ب. باتتسەتسەگ قازاقستان رەسپۋبليكاسى پرەمەر- ءمينيسترىنىڭ ورىنباسارى - سىرتقى ىستەر ءمينيسترى م. تىلەۋبەردىگە سىرتقى ساياسات ۆەدومستۆوسىنىڭ باسشىسى بولىپ تاعايىندالۋىنا وراي جولداعان جىلى لەبىزدى قۇتتىقتاۋى ءۇشىن ريزاشىلىعىن ءبىلدىردى. سونداي- اق، مينيستر ەكىجاقتى ىنتىماقتاستىقتى ودان ءارى تەرەڭدەتۋ ماقساتىندا بىرلەسىپ جۇمىستى جالعاستىرۋعا دايىن ەكەنىن اتاپ ءوتتى» دەپ جازدى موڭعوليالىق ب ا ق.

ءوز كەزەگىندە، ەلشى ج. ادىلبايەۆ موڭعول مينيسترىنە ەلدىڭ قازىرگى باسشىلىعىنىڭ باستاماسىمەن قازاقستانداعى ساياسي جانە الەۋمەتتىك- ەكونوميكالىق رەفورمالار مەن قازاقستان تاۋەلسىزدىگىنىڭ 30 جىلدىعىنا وراي وتكىزىلەتىن ءىس- شارالار تۋرالى ماعلۇمات بەردى.

موڭعوليالىق ب ا ق- تىڭ كەلتىرگەن دەرەگىنە سۇيەنسەك، كەزدەسۋ بارىسىندا تاراپتار قازاق- موڭعول ىنتىماقتاستىعىنىڭ جاعدايى مەن كەلەشەگىن تالقىلاي وتىرىپ، ءوزارا سىيلاستىق، اشىقتىق پەن سەنىم قاعيدالارىنا نەگىزدەلگەن جوعارى دەڭگەيدەگى ساپارلار ەكىجاقتى قارىم- قاتىناستاردى ىلگەرىلەتۋدە ماڭىزدى ءرول اتقاراتىنىن اتاپ وتكەن.

«بۇعان قوسا، كولىك، ينۆەستيتسيالىق جانە ساۋدا- ەكونوميكالىق ىنتىماقتاستىق سالاسىنداعى كوپتەگەن وزەكتى ماسەلەلەر، سونداي- اق شارتتىق- قۇقىقتىق بازانى كەڭەيتۋ بويىنشا سىندارلى پىكىرلەر الماسىلدى. بۇل رەتتە، ءبىرقاتار ەكىجاقتى كەلىسىمدەردى جاڭارتۋ قاجەتتىلىگى بار ەكەنى دە ايتىلدى. سونىمەن قاتار، حالىقارالىق ساحىناداعى ارەكەتتەردى ودان ءارى ۇيلەستىرۋ ماسەلەلەرى كوتەرىلدى. موڭعول تاراپىنا قازاقستاننىڭ حالىقارالىق باستامالارىن قولداعانى ءۇشىن ريزاشىلىق ءبىلدىرىلدى»، دەپ جازادى Kaznews اقپاراتتىق پورتالى.

وزبەكستانعا قازاقستاننىڭ «UStudy» تەست جۇيەسى ەنگىزىلۋى مۇمكىن - «ءو ز ا» اقپاراتتىق اگەنتتىگى

وزبەكستانداعى تەست جۇيەسىن جەتىلدىرۋ ءۇشىن قازاقستاننىڭ 2013 -جىلى نەگىزى قالانعان «UStudy» تەست جۇيەسى ەنگىزىلۋى مۇمكىن، دەپ حابارلايدى « ءو ز ا». وزبەكستاندىق ب ا ق- تىڭ كەلتىرگەن دەرەگىنە سۇيەنسەك، ءبىلىم مينيسترلىگىنىڭ حابارلاۋىنشا، 25 -ناۋرىزدا مينيسترلىكتە قازاق ەلىنىڭ «UStudy» تەست ورتالىعى وكىلدەرىمەن وزبەكستاندا تەست الۋ پروتسەسىنىڭ اشىقتىعىن قامتاماسىز ەتۋگە جانە ءبىلىم ساپاسىن ارتتىرۋعا باعىتتالعان كەزدەسۋ وتكەن. كەزدەسۋدە ەكى تاراپ ەكى ەلدىڭ ءبىلىم بەرۋ جۇيەسىنىڭ ارحيتەكتۋراسى، سالاداعى جەتىستىكتەر مەن بار پروبلەمالار تۋرالى پىكىر الماسقان. سونىمەن قاتار، قازاقستاندىق دەلەگاتسيا وكىلدەرى «Ustudy» تەست ورتالىعىنىڭ قىزمەتىن، ولار ەنگىزگەن يننوۆاتسيالىق قۇرىلعىلار جانە ولاردىڭ مۇمكىندىكتەرى جايلى تانىستىرعان.

«قازىرگى كۇندە قازاقستاندا 56 ايماقتىق ورتالىعى بار «UStudy» تەست ورتالىعىنىڭ وكىلدەرى، وزبەكستانداعى ءبىلىم بەرۋدى ودان ءارى دامىتۋ، يننوۆاتسيالىق جانە زاماناۋي اقپاراتتىق تەحنولوگيالاردى كەڭىنەن ەنگىزۋ ماقساتىندا وزبەكستاندا «Ustudy» تەست ورتالىقتارىن اشۋ بويىنشا ىنتىماقتاستىق ماسەلەلەرىن ەگجەي- تەگجەيلى تالقىلادى»، دەپ حابارلايدى uza.uz.

ايگۇل كەستەشىلىك ونەرىمەن باقىتتى تۇرمىستى كەستەلەدى - kazakcnr

اعىمداعى اپتادا قىتايدىڭ CNR باسىلىمىندا وسىنداي تاقىرىپتاعى اقپارات جاريالاندى. «ناۋرىز ايى كەلىپ، بايتاق دالادا كوكتەم لەبى ەسىپ، كۇللى تىرشىلىك جانداندى. ايگۇل دە كوكتەمگى قاربالاسقا ءتۇستى. ول بالا كەزىنەن كەستەشىلىككە قىزىعاتىن. ونىڭ تىككەن كەستە بۇيىمدارى قىستاقتاعى كووپەراتيۆ ارقىلى ساتىلىپ، مال باعۋدان باسقا وتباسىنىڭ تاعى ءبىر كىرىس كوزىنە اينالدى»، دەپ جازادى قىتايلىق CNR.

بۇگىنگى كۇندە، ءبىر جاعىنان مال شارۋاشىلىعى، ەندى ءبىر جاعىنان قازاقتىڭ شەشەدەن قىزعا مۇرا بولىپ كەلە جاتقان ءداستۇرلى قولونەرىنىڭ ءبىرى كەستەشىلىكپەن اينالىسقان ايگۇلدىڭ وتباسى كەدەيلىكتەن قۇتىلعان.

تۇركيا مادەنيەت مينيسترىنە «اباي» مەدالى بەرىلدى - TRT

ت ر مادەنيەت جانە تۋريزم ءمينيسترى مەحمەت نۋري ەرسوي ناۋرىز مەرەكەسىنە وراي تۇرىك مادەنيەتىنىڭ حالىقارالىق ۇيىمى تۇرىكسويعا باردى. بۇل تۋرالى وسى اپتادا تۇركيا راديو تەليەۆيزيا پورتالى حابارلادى.

«مادەنيەت جانە تۋريزم ءمينيسترى مەحمەت نۋري ەرسويدى باس حاتشى دۇيسەن قاسەيىنوۆ قارسى الدى. قاسەيىنوۆپەن ناۋرىز وتىن الاۋلاتقان مينيستر وتتىڭ ۇستىنەن سەكىرىپ، ءتوس سوعىپ، تەمىر ۇردى. ەرسوي وسىندا تۇرىك الەمىن ناۋرىز مەرەكەسىمەن قۇتتىقتادى. ول ناۋرىزدىڭ الەم حالىقتارىنىڭ ورتاق مۇراسى بولىپ قابىلدانعانىن ايتتى. تۇرىكسوي ءىس- شارالارىن بۇكىل الەمگە تاراتىپ، مادەني قاتىناستاردى نىعايتۋدى ماقسات ەتكەندەرىن ءبىلدىردى»، دەپ جازدى TRT.

تۇركيالىق ب ا ق- تىڭ دەرەگىنشە، تۇرىكسوي باس حاتشىسى دۇيسەن قاسەيىنوۆ تا ناۋرىز مەرەكەسىنىڭ تۇرىكسوي جانە ۇيىمعا مۇشە ەلدەردىڭ باستاماسىمەن ەندى ادام بالاسىنىڭ مۇراسى ەكەنىن، 2009 -جىلى يۋنەسكو- دا ادام بالاسىنىڭ ماتەريالدىق ەمەس مادەني مۇراسى تىزىمىنە ەنگەنىن ەسكە سالدى.

ول ارتىنان 2010 -جىلى 23-اقپان كۇنى ب ۇ ۇ- نىڭ 21 -ناۋرىز كۇنىن حالىقارالىق ناۋرىز مەرەكەسى دەپ جاريالاعانىن ايتتى.

«ءىس- شارا بارىسىندا تۇرىك الەمىنىڭ بيلەرى ساحنالاندى. ارتىنان مينيستر ەرسويعا ناۋرىز سەمەني مەن «اباي» مەدالى تابىستالدى»، دەپ جازادى تۇركيالىق ب ا ق.

يران- قازاقستان ونلاين- فوتوكورمەسى اشىلدى – فارس

يران- قازاقستان ونلاين- فوتوكورمەسى يراندىق جانە قازاق داستۇرلەرىن، ەكى ەلدەگى تابيعاتتى جانە مادەني مۇرانى تانىستىرۋ ماقساتىندا اشىلدى، دەپ حابارلايدى يراننىڭ parstoday اقپارات اگەنتتىگى.

اتالعان ب ا ق- تىڭ دەرەگىنە سۇيەنسەك، ونلاين- فوتوكورمە يراننىڭ جاڭالىقتار اگەنتتىگى (IRNA) مەن قازاقستان جاڭالىقتارى اگەنتتىگى (Kazinform) ارقىلى تەھران مەن نۇر- سۇلتاندا ءبىر مەزگىلدە كورسەتىلگەن.

«كورمە ەكى اقپاراتتىق اگەنتتىكتىڭ فوتوگرافتارى تۇسىرگەن فوتوسۋرەتتەردى ۇسىندى. بۇل كورمەدە قازاقستاندىقتار يراندىق اتاقتى ادامدارمەن جانە مۇرالارمەن، ال يراندىقتار قازاقستاننىڭ سالت- داستۇرلەرى، تاعام- تاماقتارىمەن، كيىمدەرى مەن تاريحي ەسكەرتكىشتەرىمەن جانە اسەم تابيعاتىمەن تانىسادى. IRNA مەن Kazinform كاسىبي ىنتىماقتاستىق تۋرالى ءوزارا تۇسىنىستىك تۋرالى مەموراندۋمعا يە جانە كاسىبي جاڭالىقتارمەن جانە تاجىريبەمەن الماسۋدان باسقا، ازيا- تىنىق مۇحيتى جاڭالىقتارى اگەنتتىگىندە (OANA) بىرگە جۇمىس ىستەيدى»، دەپ جازادى يراننىڭ parstoday اقپارات اگەنتتىگى.

اۆتور: بەيسەن سۇلتان