كوروناۆيرۋس: استانالىق دارىگەرلەر قايتادان ەكى ەسە جۇكتەمەمەن جۇمىس ىستەپ جاتىر

بۇل تۋرالى نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ايتىپ بەردى، دەپ حابارلايدى قازاقپارات ءتىلشىسى.

«كوروناۆيرۋس ينفەكسياسى ناۋقاستارىنىڭ ءوسىمى ناۋرىز مەيرامىنان كەيىن بايقالدى. بۇل حالىقتىڭ سانيتارلىق نورمالاردى ساقتاماۋ، ادام كوپ شوعىرلانعان ورىندارعا بارۋ، كارانتين رەجيمىن بۇزۋىنا بايلانىستى بولدى. استانالىق دارىگەرلەر مەن بارلىق مەديتسينا قىزمەتكەرلەرى قايتادان ەكى ەسە جۇكتەمەمەن جۇمىس ىستەپ جاتىر. بۇگىندە ينفەكتسيامەن كۇرەسكە 3700 دەن استام مەديتسينا قىزمەتكەرى تارتىلدى. جۇقپالى اۋرۋلار ستاتسيونارىنداعى جۇمىس ءۇشىن قۇرىلعان كادرلىق رەزەرۆ تە كۇننەن- كۇنگە شاقىرىلىپ جاتىر»، - دەدى ت. مۇراتوۆ ەلوردا اكىمدىگىندە وتكەن ونلاين بريفينگتە.

ايتا كەتەيىك، ناۋرىزدىڭ 25 كۇنىندە 3754 جاڭا ك ۆ ي جاعدايى تىركەلگەن، مۇنى 2020 -جىلعى شىلدە ايىنىڭ باسىنداعى كورسەتكىشكە تەڭەۋگە بولادى. بۇگىندە جۇقپالى اۋرۋلار ستاتسيونارىندا 480 ادام جاتىر (توسەك- ورىننىڭ 64 پايىزى). جانساقتاۋ بولىمىندە ەم قابىلدايتىن ناۋقاستار سانى ارتتى. قازىرگى ۋاقىتتا بۇل بولىمدە 55 ناۋقاس جاتىر، ونىڭ ىشىندە 14 ى جاساندى تىنىس الۋ ماشيناسىمەن دەم الۋدا. بۇعان دەيىن تيمۋر مۇراتوۆ ەلورداداعى ەپيدەميولوگيالىق جاعدايدى شىلدە ايىنداعى اۋىر كەزەڭگە تەڭەگەن ەدى.

اۆتور: ايجان سەرىكجان قىزى