بىلمەيتىندەر سىن ايتادى

None
None
نۇر-سۇلتان. قازاقپارات - قىلقالامنىڭ شەبەرى، تانىمال سۋرەتشى ءبىر شاكىرتىنە باتاسىن بەرىپ، ەلىنە جىبەرەردە وعان سوڭعى تاپسىرماسىن بەرەدى.

«سالعان سۋرەتىڭدى قالانىڭ ادام ەڭ كوپ شوعىرلانعان بولىنىگە ورنالاستىر، قاسىنا قىزىل قالام قويىپ، حالىقتان قاتە بولعان، دۇرىس شىقپاعان جەرلەرىنە «х» بەلگىسىن قويۋىن وتىنگەن جازۋ ءىل»، - دەيدى.

شاكىرت ۇستازىنىڭ ايتقانىن بۇلجىتپاي ورىنداپ، ءبىر كۇننەن كەيىن قايتىپ كەلگەندە، سۋرەتىنىڭ بارلىق جەرى

قىپ- قىزىل «х» بەلگىسىنە تولى ەكەندىگىن كورەدى. كوڭىل- كۇيى ءتۇسىپ، ۇستازىنا كەلەدى. ۇستازى: «ەڭسەڭدى تۇسىرمە بالام، تاعى ءبىر سۋرەت سال، ونى دا تاعى سول باياعى جەرگە اپارىپ ورنالاستىر. ءبىراق، بۇل جولى قاسىنا ءتۇرلى- ءتۇستى بوياۋ مەن قىلقالام قويىپ، ادامداردان قاتە بولعان، دۇرىس شىقپاعان جەرلەرىن تۇزەتۋىن وتىنگەن جازۋ ءىل»، - دەيدى. شاكىرت قايتادان ايتىلعانداردى تولىقتاي ورىندايدى.

ءبىر كۇننەن كەيىن كەلگەندە، سۋرەتكە ەشكىم تيمەگەنىن كورەدى. سۋرەت باز- باياعى قالپىندا ەدى. قۋانىشى ىشىنە سىيماي، تەزدەتىپ ۇستازىنا كەلەدى.

ۇستازى: «العاشقىدا ادامدارعا ءمىن ىزدەۋگە مۇمكىندىك بەرگەنىڭدە، اياۋسىز سىنعا ۇشىراعان ەدىڭ. ومىرىندە سۋرەت سالىپ كورمەگەن ادامدار دا قاتە تاۋىپ، سۋرەتىڭدى قارالاپ كەتتى. كەلەسى جولى، ولاردان جاسامپاز بولۋدى سۇرادىڭ. ال جاسامپاز بولۋ - شىعارماشىلىقتى، ءتالىم الۋدى، ۇيرەنۋدى قاجەت ەتەدى. ەشكىم بىلمەيتىن نارسەسىن جاساۋعا باتا المادى. ساعان ايتارىم، ەڭبەگىڭنىڭ ناتيجەسىن (ءادىل باعاسىن)، نە ىستەگەنىڭدى بىلمەيتىندەردەن الا المايسىڭ. جۇمىسىڭدى قادىرىن بىلمەيتىندەرگە ۇسىنبا جانە بىلمەيتىندەرمەن ەشقاشان ءسوز تالاستىرما!» - دەگەن ەكەن.


سوڭعى جاڭالىقتار