13:15, 17 - ناۋرىز 2021 | GMT +6
«سپۋتنيك ۆ» سالدىرعاننان كەيىن ءولىم جاعدايى بولدى ما؟
نۇر-سۇلتان. قازاقپارات - گامالەيا ورتالىعىنىڭ باسشىسى الەكساندر گينسبۋرگ «سپۋتنيك ۆ» ۆاكسيناسىن سالدىرعاندار اراسىندا COVID-19-دان قايتىس بولعاندار جوعىن مالىمدەدى، - دەپ حابارلايدى ريا نوۆوستي اقپارات اگەنتتىگىنە سىلتەمە جاساپ.
«سپۋتنيك ۆ» ۆاكسيناسىن سالدىرعان ادامداردا وسى ۆيرۋستى جۇقتىرۋ سالدارىنان جاعدايى اۋىرلاعان جانە ولىمگە اكەلگەن وقيعالار بولعان جوق. وتە كوپ ادامعا سىناق وتكىزىلدى. ولاردىڭ بارلىعى قورعالعان»، - دەدى مامان.
ول ۆاكسينانىڭ ەكىنشى دوزاسىنان كەيىن ادامدا جوعارى يممۋندىق رەاكسيا پايدا بولاتىنىن، سونىمەن قاتار، اعزا پاتوگەندى كەزدەستىرگەن كەزدە قىسقا مەرزىم ىشىندە قورعانىس انتيدەنەلەرىنىڭ قاجەتتى مولشەرىن جاسايتىن «جاد جاسۋشالارىنىڭ» كوپ مولشەرى پايدا بولاتىنىن ءتۇسىندىردى.
« سپۋتنيك ۆ « - گامالەيا ۇلتتىق ەپيدەميولوگيا جانە ميكروبيولوگيا عىلىمي-زەرتتەۋ ورتالىعىندا جاسالعان ۆاكسينا. ول ادامنىڭ ادەنوۆيرۋس ۆەكتورلارىنىڭ پلاتفورماسى نەگىزىندە جاسالعان.