كوكسۋ قانت زاۋىتى قامىستان قانت ءوندىرۋدى باستادى

بۇعان دەيىن كاسىپورىن شەكەردى قانت قىزىلشاسىنان الاتىن، دەپ حابارلايدى قازاقپارات ءتىلشىسى.

بۇل زاۋىتتىڭ جىل ون ەكى اي جۇمىس ىستەۋىنە مۇمكىندىك بەرىپ وتىر. سايكەسىنشە جۇمىس ونىمدىلىگى ارتىپ، ەل نارىعىنا ۇسىنىلاتىن قانت كولەمى دە ەسەلەنبەك.

قانت شيكىزاتى برازيليا مەن مەكسيكا ەلدەرىنەن تاسىمالدانادى. قىزىلشاعا قاراعاندا قامىستان قانت وندىرۋدە اسا ءبىر ايىرماشىلىق جوق. جارتىلاي دايىن شيكىزات جوعارى تەمپەراتۋرامەن شىرىنعا اينالادى. ارنايى تسەنترافۋگالار ارقىلى قانت ءسۇزىلىپ الىنىپ، اعارتىلادى. تۇسىندە دە، دامىندە دە ەشقانداي وزگەشەلىك جوق. باستى ەرەكشەلىگى ونىڭ ونىمدىلىگىندە، دەيدى كاسىپورىن باسشىسى.

«شىعۋ ءونىمى قىزىلشادا 12 پايىز بولاتىن بولسا، مىندا شامامەن 99 پايىز ءونىم شىعادى. شيكىزاتتىڭ وزىنەن»، - دەيدى قانت زاۋىتىنىڭ ديرەكتورى التىنبەك اباتوۆ.

زاۋىتتىڭ جاڭا وندىرىسىنە 400 دەي جۇمىسشى قۋاندى. ەگەر قانت قىزىلشاسىن ءوندىرۋ كەزىندە نەبارى ءتورت اي جۇمىس ىستەگەن بولسا، ەندى جىل بويى ەڭبەك ەتىپ، جالاقى الادى. سولاردىڭ قاتارىندا 13 جىلدىق ەڭبەك ءوتىلى بار زەرتحانا قىزمەتكەرى جازيرا دۇسپەكوۆا دا بار.

«بۇعان دەيىن جۇمىس ماۋسىمدىق بولعاندىقتان ول كەزدە باسقا جاقتان جۇمىس ىزدەپ كەتەتىنبىز. ەندى ۇزىلمەيدى. جۇمىسىمىزدىڭ توقتاماي جالعاسىپ جاتقانىنا ريزامىز»، - دەدى زەرتحانا قىزمەتكەرى جازيرا دۇسپەكوۆا.

كاسىپورىن سوڭعى 4-5 جىلدا جۇمىستىڭ 80 پايىزىن اۆتوماتتاندىردى. مەملەكەت قولداۋىنىڭ ارقاسىندا جانارمايدان كوگىلدىر وتىنعا اۋىستى. سايكەسىنشە شىعىن ازايىپ، ەكولوگيالىق تالاپتار ساقتالا باستادى.

ەكى ءتۇرلى شيكىزاتتى قوسقاندا زاۋىت ءبىر جىلدا 60 مىڭ توننا تازا قانت شىعارا الاتىن مۇمكىندىككە يە بولدى. دەسە دە، الماتى وبلىسى ەلگە قاجەت قانتتىڭ نەبارى 15 پايىزىن وندىرەدى.