الماتى وبلىسىندا جەتىسۋ ءداستۇرلى ءان ورتالىعى اشىلدى
ورتالىق اياسىندا جەتىسۋلىق انشىلەر ءداستۇرلى ءان ونەرىن ناسيحاتتايدى، دەپ حابارلايدى قازاقپارات ءتىلشىسى.
جاڭا ورتالىق قوعامدىق بىرلەستىك نەگىزىندە جۇمىس ىستەيدى. ۇيىمعا ءسۇيىنباي اتىنداعى وبلىستىق فيلارمونيادا ونەر كورسەتىپ جۇرگەن كوپشىلىككە تانىمال ءداستۇرلى انشىلەر ەرلان جەبەگەنوۆ، سايا ەسەنگەلدينوۆا، قۇرالاي شاياحمەتوۆا، كەنجەكەي اقجولوۆا جەتەكشىلىك ەتەدى.
«ازىرگە ورتالىققا 20 ونەرپاز مۇشە بولىپ وتىر. الداعى ۋاقىتتا ەلىمىزدىڭ باسقا وڭىرلەرىنىڭ ءداستۇرلى انشىلەرىمەن بايلانىسقا شىعىپ، قاتارعا قوسقىمىز كەلەدى»، - دەيدى قوعامدىق ۇيىم ءتوراعاسى، حالىقارالىق جانە رەسپۋبليكالىق بايقاۋلاردىڭ لاۋرەاتى ەرلان جەبەگەنوۆ.
سونداي-اق ورتالىقتىڭ كوركەمدىك كەڭەسى قۇرىلىپ، ول جەرگە ءداستۇرلى ءان ونەرىندە وزىندىك ورنى بار، تاجىربيەلى اعا بۋىن وكىلدەرى شاقىرىلدى.
وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى مارلەن كولبايەۆتىڭ ايتۋىنشا، بۇل ۇيىم جەتىسۋ جەرىنىڭ ءداستۇرلى ءان مەكتەبىن قالىپتاستىرىپ، قالىڭ بۇقاراعا ناسيحاتتاپ دارىپتەۋدى ماقسات ەتپەك.
«سونداي-اق ورتالىق مۇشەلەرى بالالار اراسىندا ءداستۇرلى ءان، جىر-تەرمەنى دامىتۋ باعىتىندا ۇيىرمەلەر اشىپ، ونەر مەكتەپتەرىندە شەبەرلىك ساباقتارىن وتكىزەدى»، - دەيدى باسقارما باسشىسى.
ورتالىقتىڭ تاعى ءبىر ماقساتى ءداستۇرلى ءان ونەرىن، تەرمەلەرى مەن جىرلارىن دارىپتەپ كەلگەن تاريحي تۇلعالاردىڭ، اقىن-جىراۋ، ءانشى-تەرمەشى ەسىمدەرىن جاڭعىرتىپ، ولاردىڭ ورىنداعان ءتول تۋىندىلارىن جيناقتاپ، كىتاپ ەتىپ شىعارۋ.