مەكتەپتەردە قازاق كۇرەسى مەن توعىزقۇمالاق مىندەتتى ساباق رەتىندە وتكىزىلمەك

None
None
نۇر-سۇلتان. قازاقپارات - ەلىمىزدە ورتا مەكتەپتەردە «قازاق كۇرەسى»، «توعىزقۇمالاق»، «اسىق اتۋ» بويىنشا مىندەتتى ساباق وتكىزۋ ادىستەمەسى ازىرلەپ جاتىر.

بۇل جايىندا ءماجىلىس دەپۋتاتتارىنىڭ ساۋالىنا وراي ق ر پرەمەر-ءمينيسترى اسقار ءماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.

«بۇگىندە سپورت سەكتسيالارمەن شامامەن 1,4 ميلليون بالا نەمەسە مەكتەپ جاسىنداعى بالالاردىڭ جالپى سانىنىڭ (3,5 ميلليون) 40 پايىزى، ونىڭ ىشىندە 422 مىڭنان باستام بالا مەكتەپتەن تىس ۇيىمداردا قامتىلعان. بۇقارالىق سپورتتى دامىتۋ اياسىندا سپورت ينفراقۇرىلىمىن، ونىڭ ىشىندە اۋىلدى جەرلەردە دامىتۋعا باسا نازار اۋدارىلىپ وتىر. ماسەلەن، 2023-جىلعا دەيىن شامامەن 159 اۋىل مەكتەبىن سپورت زالمەن قامتاماسىز ەتۋ جوسپارلانعان»، - دەدى اسقار مامين.

ۇكىمەت باسشىسىنىڭ اتاپ وتۋىنشە، ءبىلىم جانە عىلىم مينيسترلىگى دەنە شىنىقتىرۋ مۇعالىمدەرىنىڭ بىلىكتىلىگىن ارتتىرۋ جۇمىسىن جولعا قويعان. وتكەن جىلى 447 دەنە شىنىقتىرۋ ءمۇعالىمى بىلىكتىلىك ارتتىرۋ كۋرسىنان ءوتتى.

ال بيىل 2 مىڭنان استام پەداگوگتى قايتا دايارلاۋ كوزدەلىپ وتىر. سونىمەن قاتار 2021 -جىلدىڭ قاڭتارىنان ساباقتان تىس سپورت ۇيىرمەلەرىن وتكىزگەنى ءۇشىن دەنە شىنىقتىرۋ مۇعالىمدەرىنە بازالىق لاۋازىمدىق جالاقىنىڭ 100 پايىزى مولشەرىندە ۇستەمەاقى تولەۋ ەنگىزىلدى. ۇستەمەاقى دەنە شىنىقتىرۋ مۇعالىمدەرىن ءبىلىم بەرۋ ۇيىمدارىندا سەكتسيالار اشۋعا ىنتالاندىراتىن بولادى.

«بالالاردىڭ دەنساۋلىعى مەن ءتالىم-تاربيەسىنە ۇلتتىق سپورت تۇرلەرىنەن ساباق وتكىزۋ دە وڭ اسەرىن تيگىزبەك. قازىرگى ۋاقىتتا مادەنيەت جانە سپورت مينيسترلىگى مەن ءبىلىم جانە عىلىم مينيسترلىگى «قازاق كۇرەسى»، «توعىزقۇمالاق»، «اسىق اتۋدى» الداعى ۋاقىتتا دەنە شىنىقتىرۋ بويىنشا مەكتەپ باعدارلاماسىنا قوسۋ جانە مىندەتتى ساباق رەتىندە ءوتىزۋ ءۇشىن ادىستەمە ازىرلەپ جاتىر»، - دەدى پرەمەر-مينيستر.


سوڭعى جاڭالىقتار