كيىك ءمۇيىزىن قىتايعا ساتقاندار ۇستالدى

توپتى باسقارعان بۇرىن ق ح ر ازاماتى بولعان قازاق، - دەپ حابارلايدى «اق جايىق» پورتالى.

پورتال مالىمەتىنشە، قىلمىستىق توپ باسشىسى - قىتاي ازاماتى، 38 جاستا. ەتنيكالىق قازاق شىڭجاڭ- ۇيعىر اۆتونوميالىق اۋدانىنا قاراستى قۇلجا اۋىلىندا دۇنيەگە كەلگەن. بالا كەزدەن قىتايدا ءتۇرلى كاسىپپەن اينالىسىپ، كەيىن قىرعىزستاندا كوكونىس، كيىم-كەشەك، ماتا، ىدىس-اياق ساتقان. 2016 -جىلى العاش رەت قازاقستانعا كەلىپ، الدىمەن تارازدا بولىپ، كەيىن الماتىدا بيزنەس اشقىسى كەلگەن، ءبىراق جولى بولمادى.

ءبىر جىلدان كەيىن قىتايعا قايتا ورالدى... بولمىسى قازاق قىتايلىق ازامات تاڭداۋ جاساپ، 2018 -جىلى ق ر ازاماتتىعىن الادى.

وسى جەردە كاسىپپەن اينالىسپاق بولعان، ءبىراق ونىڭ كوڭىلى بۇرىننان باسقادا بولعان. سول 2018 -جىلى ول قىلمىستىق جولمەن كاسىپ باستاپ، ءوزىنىڭ بۇرىنعى تۋعان جەرىنە كيىكتىڭ ءمۇيىزىن ساتتى.

سوت تالقىلاۋىندا 2018 -جىلدىڭ جاز ايىنان باستاپ 38 جاستاعى ەر ادام كيىك مۇيىزدەرىن شىعىس مەديتسيناسىمەن اينالىساتىندارعا ساتۋ ماقساتىندا قازاقستاندا قىلمىستىق توپ قۇراعانى انىقتالعان.

الدىمەن توپقا الماتى مەن شىمكەنت قالاسىنىڭ تۇرعىندارى قوسىلىپ، كەيىن قىلمىستىق توپتىڭ قۇرامى ورال، اتىراۋ، الماتى، قىزىلوردا، شىمەنت، قاراعاندى، جەزقازعان تۇرعىندارىمەن تولىقتى.

شىمكەنت قالاسىنىڭ تۇرعىنى بۇرىندارى كيىك ءمۇيىزىن ساتۋمەن اينىلىسىپ جۇرگەن ادامدارمەن بايلانىستى.

جۇمىس بارىسى مىناداي: ولار كيىكتىڭ ءمۇيىزىن ايتىلعان وڭىرلەردەن ساتىپ الىپ، پويىزبەن الماتىعا جولسەرىكتەر ارقىلى جىبەرىپ وتىرعان (ولار قاپتامادا نە بار ەكەنىن بىلمەيدى). ول جەردەن باعالى جۇك قىتايعا وتكىزىلەدى.

«ءبىزدىڭ ءوڭىردى ايتار بولساق: اتىراۋدا بۇرىنعى قىتاي ازاماتىنا كيىكتىڭ ءمۇيىزىن قىزىلقوعا اۋدانىنىڭ ءۇش تۇرعىنى، 36 جاستاعى ماحامبەت اۋدانىنىڭ تۇرعىنى جانە يندەر اۋدانىنىڭ 46 جاستاعى تۇرعىنى ساتقان»، - دەلىنگەن ماتەريالدا.

2019 -جىلدىڭ قازانىندا قىلمىستىق توپتى الماتى، اقتوبە جانە اتىراۋداعى ۇلتتىق قاۋىپسىزدىك قىزمەتكەرلەرى قۇرىقتادى. جەدەل تەرگەۋ توبى ءتىنتۋ جۇرگىزگەن كەزدە 1 توننا 118 كەلى كيىكتىڭ ءمۇيىزىن تاركىلەدى. قىلمىسكەرلەر جانۋاردى ءولتىرىپ، ءمۇيىزىن كەسىپ الىپ، ال ەتىن دالاعا تاستاعان.

ماماندار ەسەبى بويىنشا، قىلمىستىق توپتىڭ زاڭسىز ارەكەتىنەن مەملەكەتكە 5 ميلليارد 665 ميلليون تەڭگە مولشەرىندە زيان كەلگەن. ءتىپتى قىلمىستىق توپتىڭ مۇشەلەرى ۇستالعان كەزدە توپ باسشىسى پارا بەرىپ، توقتاتقىسى كەلگەن ەكەن. الايدا ول جوسپارى ىسكە اسپاعان.

قىلمىستىق ءىس اتىراۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالىپ، سوت 12 ادامدى ق ر قىلمىستىق كودەكسىنىڭ 262 جانە 339-بابىمەن كىنالى دەپ تانىلدى.

ۇيىمداسقان قىلمىستىق توپ باسشىسى 8 جىل باس بوستاندىعىنان ايىرىلدى. ەكى ادامعا ودان از بەرىلدى. سوتتالۋشىنىڭ بارلىعى دا قىلمىسىن مويىنداماي، وبلىستىق سوتقا اپەللياتسيالىق شاعىم ءتۇسىردى. الايدا سوت ۇكىمى وزگەرىسسىز قالدى.