12:46, 05 - ناۋرىز 2021 | GMT +6
قاسىم-جومارت توقايەۆ تۇركيا پرەزيدەنتى رەدجەپ تايپ ەردوعانعا كوڭىل ايتۋ جەدەلحاتىن جولدادى
نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ «كۋگار» اسكەري تىكۇشاعىنىڭ اپاتقا ۇشىراپ، بىرنەشە ادامنىڭ قازا بولۋىنا بايلانىستى تۇركيا پرەزيدەنتى رەدجەپ تايپ ەردوعانعا قازاقستان حالقىنىڭ جانە جەكە ءوزىنىڭ اتىنان كوڭىل ايتۋ جەدەلحاتىن جولدادى.
بۇل تۋرالى قازاقپارات اقورداعا سىلتەمە جاساپ حابارلايدى.
«تۇركيانىڭ شىعىسىنداعى بينگەل ايماعىندا اپاتقا ۇشىراعان «كۋگار» اسكەري تىكۇشاعىندا قۇربان بولعان جانە زارداپ شەككەندەر تۋرالى اقپاراتتى تەرەڭ كۇيزەلىسپەن قابىل الدىم. وسىنداي اۋىر ساتتە قايعى-قاسىرەتتەرىڭىزگە ورتاقتاسىپ، بارشا قازاقستاندىقتاردىڭ جانە جەكە ءوز اتىمنان سىزگە، سونداي-اق، باۋىرلاس تۇرىك حالقىنا قايعىرا كوڭىل ايتامىن. اللا تاعالادان قازا بولعانداردىڭ جاندارى ءجانناتتا بولۋىن، جارالانعانداردىڭ تەز ارادا ساۋىعىپ كەتۋىن تىلەيمىن»، - دەپ جازىلعان جەدەلحاتتا.
وسىعان دەيىن تۇركيانىڭ شىعىسىندا تىكۇشاق اپاتقا ۇشىراعانىن حابارلاعان بولاتىنبىز. كەيىنىرەك ۇشاق اپاتى سالدارىنان 11 ادامنىڭ قۇربان بولعانى حابارلاندى.