د د س ۇ ەۋروپالىق بيۋروسى پاندەميا كەزىندە گەندەرلىك تەڭسىزدىكتىڭ كۇشەيگەندىگىن مالىمدەدى
بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ (د د س ۇ) ەۋروپالىق ايماقتىق بيۋروسىنىڭ ديرەكتورى حانس كليۋگە بەيسەنبى كۇنى Facebook-تە جاريالانعان كوپەنگاگەندە وتكەن بريفينگتە مالىمدەدى، دەپ حابارلايدى قازاقپارات.
«پاندەميا باستالعان كەزدە بۇل ايماقتا بىردە- ءبىر ەل گەندەرلىك تەڭدىككە قول جەتكىزە المادى. بىردە- ءبىر. كوبىنەسە ايەلدەر قاۋىمى بالالاردى ۇيدە كارانتيندە وقىتۋعا جاۋاپ بەرەدى. بالاعا اقى تولەنبەيتىن كۇتىم ءبىرىنشى كەزەكتە ايەلدەردىڭ مىندەتىنە اينالادى، بۇل ولاردىڭ اقى تولەنەتىن جۇمىستى ورىنداۋ مۇمكىندىكتەرىن شەكتەيدى»، - دەدى ول. ونىڭ ايتۋىنشا، ايەلدەر ءالى كۇنگە دەيىن ۇلتتىق نەمەسە جاھاندىق دەڭگەيدە پاندەمياعا قارسى شارالار تۋرالى شەشىم قابىلداۋ پروتسەسىنە قاتىسپايدى.
بۇل رەتتە الەمنىڭ مەديتسينالىق مەكەمەلەرىندەگى 10 دەنساۋلىق ساقتاۋ قىزمەتكەرىنىڭ 7 دەن استامى - ايەلدەر، ال ەۋروپا وڭىرىندە مەدبيكەلەردىڭ %84 ى جانە دارىگەرلەردىڭ %53 ى. ايماقتىق بيۋرونىڭ ديرەكتورى COVID-19 جاھاندىق جاعدايلارىنىڭ %8 ى دەنساۋلىق ساقتاۋ سالاسىنىڭ قىزمەتكەرلەرىنە ءتيىستى ەكەندىگىن جانە ولاردىڭ جۇقتىرۋ قاۋپى پاتسيەنتتەردىڭ كوپشىلىگىنە قاراعاندا ءۇش ەسە كوپ ەكەنىن ءتۇسىندىردى. بەس اپتا بۇرىن كوروناۆيرۋس جۇقتىرعان 1,3 ميلليون مەديتسينا قىزمەتكەرىنىڭ %68 ى ايەلدەر بولدى.