قازاقستاندا تۇرعىن ءۇي تاعى قىمباتتاي ما؟

وعان سەبەپ نە؟ وعان باستى سەبەپ - قۇرىلىس ماتەريالدارىنىڭ قىمباتتاۋى. باعانىڭ وسۋىنە بايلانىستى نىسانداردىڭ وزىندىك قۇنى جوباداعى باعاسىنان اسىپ كەتىپ جاتىر. ەگەر ونى نارىقپەن سايكەستەندىرمەسە قۇرىلىس توقتاپ قالۋى دا مۇمكىن.

قۇرىلىس ماتەريالدارىنىڭ قىمباتتاۋى جاڭا نىساننىڭ ءوزىندىق قۇنىن كوتەرەدى. بۇل اسىرەسە، مەملەكەتتىك باعدارلاما بويىنشا سالىنىپ جاتقان ءۇيدىڭ باعاسىنا اسەر ەتۋى مۇمكىن. ويتكەنى تاپسىرىس الدىن الا بەرىلىپ، سمەتالىق جوبا بەكىتىلەدى. وندا وزگەرىس ەنگىزۋ قاراستىرىلماعان. ال قۇرىلىس 1-2 جىلعا جالعاساتىنىن ەسكەرسەك، وسى ارالىقتا ماتەريال ەكى ەسە قىمباتتاۋى مۇمكىن. سايكەسىنشە، قۇرىلىس كومپانياسى شىعىنعا باتادى. نەمەسە قارجىنى ۇنەمدەۋ ءۇشىن ساپاسىز ماتەريال قولدانۋى عاجاپ ەمەس.

«وندايدىڭ الدىن الۋ ءۇشىن باعانى نارىققا بەيىمدەپ وتىرۋ ءتارتىبىن ەنگىزۋ كەرەك»، - دەيدى قۇرىلىسشىلار وداعىنىڭ وكىلدەرى. تاۋار تاسىمالىمەن اينالىساتىن كاسىپكەرلەردىڭ ايتۋىنشا، باعا ءالى دە كوتەرىلۋى مۇمكىن. ەگەر بولجام راستالسا، كەيىبىر كومپانيالاردىڭ قۇرىلىستى اياقتاۋعا قارجىسى جەتپەي قالادى.

www.24.kz