نۇرتورە ءجۇسىپ كىتاپحانا قىزمەتكەرلەرىنىڭ جالاقىسىن كوتەرۋگە قاتىستى ۇسىنىس جاسادى

ول سەنات وتىرىسىندا ەلىمىزدىڭ پرەمەر-مينيسترىنە وسىنداي دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.

وسى ورايدا ول 2020 -جىلعى 1-قاڭتاردان رەسپۋبليكالىق مادەنيەت ۇيىمدارى قىزمەتكەرلەرىنىڭ جالاقىسى، سونداي-اق وڭىرلىك دەڭگەيدە وسكەنىن ەسكە سالدى. بۇل باسقارۋشى جانە نەگىزگى پەرسونالدارعا عانا قاتىستى.

«ال قوسالقى پەرسونال، ينجەنەرلەر، پروگرامميستەر مەن كىتاپحانالاردىڭ فۋنكسيونالدىق قىزمەتىن قامتاماسىز ەتەتىن ماماندار جالاقىسى كوتەرىلمەي قالعان. ايماقتارداعى كىتاپحاناشىلار ايلىعى بۇدان دا تومەن»، - دەدى نۇرتورە ءجۇسىپ.

سەناتور كىتاپحانا قىزمەتكەرلەرىنىڭ جالاقىسىن كوتەرىپ قانا قويماي، ەلىمىزدىڭ كىتاپحانالارىن، كىتاپ قويمالارى مەن مۇراعاتتارىن ماتەريالدىق- تەحنيكالىق قامتاماسىز ەتۋ پروبلەمالارىن شەشۋ ماڭىزدى دەپ سانايدى. دەپۋتاتتىڭ ايتۋىنشا، ۇلتتىق مۇراعات قورى تۋرالى ەرەجە جەتىلدىرۋدى تالاپ ەتەدى. وسى ۋاقىتقا دەيىن ارحيۆتىك اقپارات تۋرالى ءبىرتۇتاس رەسپۋبليكالىق كلاسسيفيكاتور جاسالماعان.

مۇنداي كلاسسيفيكاتور زاماناۋي كاتالوگتاردى، مالىمەتتەردىڭ ەلەكتروندىق بازاسىن، ەلەكتروندى ارحيۆ، اقپارات ىزدەۋ سالاسىن دامىتۋ ءۇشىن اسا ماڭىزدى.

اۆتور: رۋسلان عابباسوۆ