سەناتور ەلگە كەلگەن قانداستارعا ءتولقۇجاتتى ناۋرىز مەرەكەسىندە تابىستاۋدى ۇسىندى
بۇل تۋرالى دەپۋتات ۇكىمەتكە جولداعان ساۋالىندا ايتتى، دەپ حابارلايدى قازاقپارات ءتىلشىسى. سەناتتىڭ جالپى وتىرىسىندا دەپۋتات ءاز ناۋرىزدى تويلاۋعا قاتىستى بىرنەشە ۇسىنىسىن جاريا ەتتى. سەناتور ەرىكتىلەردىڭ بەلسەندى قاتىسۋىمەن وتەتىن «ناۋرىز مەيىرىمى» جالپى ۇلتتىق اكسياسى سەكىلدى شارالارىنىڭ ماڭىزىن اتاپ ءوتتى.
«جاس ۇرپاققا ەكولوگيالىق تاربيە بەرۋ ءۇشىن اۋماقتاردى اباتتاندىرۋ، بۇلاقتاردىڭ كوزىن اشۋ مەن اعاش وتىرعىزۋدى داستۇرگە اينالدىرۋ قاجەت. وڭتۇستىك وڭىرلەردە ناۋرىز مەرەكەسىندە جانە مۇنداي اكسيانى قولايلى كليمات كەشىرەك كەلەتىن سولتۇستىك وڭىرلەردە كەيىنىرەك ۇيىمداستىرۋ قاجەت دەپ سانايمىز. سونىمەن قاتار، ەلگە ورالعان قانداستاردىڭ وتباسىلارى مەن باسقا ەتنوستاردىڭ وكىلدەرىنە مەرەكە كۇندەرى قازاقستاندىق پاسپورتتى سالتاناتتى تاپسىرۋ ءراسىمى ەنگىزىلسە، سيمۆولدىق ءتۇرعىدان قۇبا- قۇپ بولار ەدى»، - دەدى التىنبەك نۋح ۇلى.
زامان تالابىمەن ۇندەسەتىن بۇقارالىق شارالاردى وسكەلەڭ ۇرپاققا، قاستەرلى وتانىڭ مەن وتباسىڭا، تۋعان توپىراعىڭا سۇيىسپەنشىلىكپەن ناسيحاتتاۋ ماڭىزدى. دەپۋتاتتىڭ سوزىنە قاراعاندا، ناۋرىزدىڭ يدەيالىق مازمۇنىن بالالار مەن جاستار اۋديتورياسىنا الەۋمەتتىك جەلى جانە وزگە دە كەڭىستىكتەگى شارالار ارقىلى ءسىڭىرۋدىڭ ءمانى ايرىقشا. سەناتور ءوز ساۋالىندا ۇلتتىق قۇندىلىقتاردىڭ ناسيحاتى مەن رۋحاني دامۋ، مەملەكەتتىك ءتىلدىڭ مارتەبەسىن ارتتىرۋ تاقىرىبىنداعى وزەكتى ويلارىن ورتاعا سالدى.
اۆتور: رۋسلان عابباسوۆ