قازاقستاندىقتارعا مۇگەدەكتىكتى بەلگىلەۋ اۆتوماتتاندىرىلادى

None
None
نۇر-سۇلتان. قازاقپارات - قازاقستاندىقتارعا مۇگەدەكتىكتى بەلگىلەۋ، جاردەماقىلاردى راسىمدەۋ اۆتوماتتاندىرىلادى.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى ەربول وسپانوۆ ايتتى، دەپ حابارلايدى قازاقپارات ءتىلشىسى.

«25-اقپاندا ق ر پرەزيدەنتى ۇلتتىق قوعامدىق سەنىم كەڭەسىنىڭ وتىرىسى بارىسىندا مۇگەدەكتىگى بار ادامدارعا بارىنشا قولايلى جاعداي جاساۋدى تاپسىردى. بۇگىنگى تاڭدا قازاقستاندىقتارعا مۇگەدەكتىكتى بەلگىلەۋ، جاردەماقىلاردى راسىمدەۋ، تەحنيكالىق قۇرالدار مەن وڭالتۋ قىزمەتتەرىن الۋ ءۇشىن ءتۇرلى مەملەكەتتىك مەكەمەلەرگە بارۋعا تۋرا كەلەدى. الدىمەن ازاماتتار مەديتسينالىق كوميسسيادان ءوتۋ ءۇشىن مەديتسينالىق مەكەمەلەرگە جۇگىنەدى. سودان كەيىن مۇگەدەكتىگىن انىقتاۋ ءۇشىن قاعاز قۇجاتتارىمەن مەديتسينالىق- الەۋمەتتىك ساراپتاما بولىمىنە بارادى. مۇنان كەيىن جاردەماقى اۆتوماتتى تۇردە مەملەكەتتىك كورپوراتسياعا جىبەرىلەدى. ال الەۋمەتتىك قىزمەتتەر، تەحنيكالىق وڭالتۋ قۇرالدارىن تاعايىنداۋ جانە الۋ ءۇشىن جەرگىلىكتى اتقارۋشى ورگانداردىڭ جۇمىسپەن قامتۋ جانە الەۋمەتتىك باعدارلامالار بولىمىنە بارۋىنا تۋرا كەلەدى»، - دەدى ەربول وسپانوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

وسى رەتتە ول بىرنەشە مەكەمە اراسىندا ءجۇرۋدى جويۋ، قاعازباستىلىقتى، سونداي-اق قىزمەت بەرۋشى مەن قىزمەت الۋشىنىڭ اراسىندا بايلانىستى بولدىرماۋ ءۇشىن جۇمىس جۇرگىزىپ جاتقانىن ايتتى.

«ءبىز پروتسەستەردى تسيفرلاندىرۋ بويىنشا جۇمىس جۇرگىزىپ جاتىرمىز. بۇل جەردە ءبىز مۇگەدەكتىكتى سىرتتاي بەلگىلەۋ تۋرالى ايتىپ وتىرمىز - ءوتىنىش بەرۋشى تەك مەديتسينالىق مەكەمەلەرگە جۇگىنەدى. قالعان پروتسەستەر ادامنىڭ قاتىسۋىنسىز اقپاراتتىق جۇيەلەردى ينتەگراتسيالاۋ ارقىلى وتەدى: جاردەماقىلار، الەۋمەتتىك قىزمەتتەر جانە تەحنيكالىق وڭالتۋ قۇرالدارى اۆتوماتتى تۇردە تاعايىندالادى. قازىردىڭ وزىندە بارلىق قاجەتتى اقپاراتتىق جۇيەلەردىڭ ينتەگراتسياسى جۇرگىزىلدى. دەنساۋلىق ساقتاۋ مينيسترلىگىمەن ينتەگراتسيانى اياقتاۋ عانا قالدى، بۇل جاقىن ارادا جاسالاتىن بولادى»، - دەدى ول.

اۆتور: مارلان جيەمباي

سوڭعى جاڭالىقتار