13:43, 03 - ناۋرىز 2021 | GMT +6
پرەزيدەنت قاسىم-جومارت توقايەۆ ۇلتتىق بانك ءتوراعاسى ەربولات دوسايەۆتى قابىلدادى
نۇر-سۇلتان. قازاقپارات - مەملەكەت باسشىسىنا بيىلعى اقپان ايىنداعى اقشا- كرەديت ساياساتىن ىسكە اسىرۋدىڭ الدىن الا قورىتىندىسى، دۇنيەجۇزىلىك ەكونوميكانىڭ قالپىنا كەلۋ پەرسپەكتيۆالارى مەن الەمدەگى ازىق-تۇلىك باعاسىنىڭ ينفلياتسياعا اسەرى تۋرالى باياندالدى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
قاسىم- جومارت توقايەۆقا التىن- ۆاليۋتا رەزەرۆتەرىنىڭ جاعدايى مەن ۇلتتىق قوردىڭ اكتيۆتەرىن باسقارۋ جايىندا ەسەپ بەرىلدى، سونداي-اق، ۇلتتىق بانكتىڭ ىشكى جالپى ءونىم بويىنشا جاڭارتىلعان بولجامدارى مەن 2021 -جىلعا ارنالعان تولەم بالانسى جونىندە ايتىلدى.
ەربولات دوسايەۆ مەملەكەت باسشىسىنىڭ قازاقستان ازاماتتارىنىڭ زەينەتاقى جيناقتارىن مەرزىمىنەن بۇرىن پايدالانۋ تەتىگىن ىسكە اسىرۋ جونىندەگى تاپسىرماسىنىڭ ورىندالۋ بارىسىن بايانداپ، ۇلتتىق بانكتىڭ ينۆەستيتسيالىق احۋالدى جاقسارتۋ بويىنشا ۇسىنىستارى تۋرالى ايتتى. پرەزيدەنت ۇلتتىق بانك ءتوراعاسىنا ازىق- تۇلىك تاۋارلارى باعاسىنىڭ تۇراقتىلىعىن قامتاماسىز ەتۋ ءۇشىن اۋىل شارۋاشىلىعىن قولداۋ شارالارىن سيفرلاندىرۋ پروتسەسىن جەدەلدەتۋدى تاپسىردى.