20:36, 28 - اقپان 2021 | GMT +6
يتاليادا پومپەي قالاسى ماڭىنان ەجەلگى زامانعى كۇيمە تابىلدى
نۇر- سۇلتان. قازاقپارات - يتالياداعى ەجەلگى پومپەي ماڭىندا جۇرگىزىلگەن ارحەولوگيالىق قازبا جۇمىستارى كەزىندە سالتاناتتى راسىمدەرگە ارنالعان ۇلكەن كۇيمە تابىلدى، دەپ حابارلايدى قازاقپارات BBC گە سىلتەمە جاساپ.
ونى بۇعان دەيىن ءۇش جىلقىنىڭ قاڭقاسى شىققان اتقورانىڭ ورنىنان تاپقان.
ءتورت دوڭگەلەگى بار تەمىر جانە قولا اشەكەيلەرمەن بەزەندىرىلگەن بۇل كۇيمە تەك مەرەكەلەر مەن شەرۋلەردە پايدالانىلعان دەپ ەسەپتەيدى عالىمدار. ولاردىڭ رەسمي حابارلاماسىندا قۇندى ولجانىڭ سول قالپىندا ساقتالعاندىعى ايتىلعان.
پومپەي تاريحي ساياباعىنىڭ ديرەكتورى ماسسيمو وساننانىڭ سوزىنە قاراعاندا، يتاليا اۋماعىندا مۇنداي كۇيمە بۇرىن- سوڭدى بولماعان. «ونى 15 جىل بۇرىن گرەكيا سولتۇستىگىندەگى فراكيا اۋماعىندا تابىلعان قۇندى جادىگەرلەرمەن عانا سالىسىتۋعا بولادى»، - دەيدى وساننا.