قازاق- وزبەك شەكاراسىندا «ورتالىق ازيا» حالىقارالىق ساۋدا ورتالىعى اشىلادى

None
None
ماقتاارال. قازاقپارات - قازاق- وزبەك شەكاراسىندا «ورتالىق ازيا» حالىقارالىق ورتالىعى اشىلادى، دەپ حابارلايدى قازاقپارات تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

ماقتاارال اۋدانىن كورشى ەلمەن بايلانىستىرىپ تۇرعان ءۇش شەكارا وتكىزۋ بەكەتى جۇمىس ىستەيدى. اتاپ ايتقاندا، «اتامەكەن» كەدەندىك بەكەتى مەن «سىرداريا»، «سەليننىي» شەكارا وتكىزۋ بەكەتتەرى ارقىلى كۇنىنە جۇزدەگەن جەڭىل كولىكتەر مەن جۇك كولىكتەرى بارىس- كەلىس جاساۋدا. ماقتاارال اۋدانى وزبەكستاننىڭ سىرداريا جانە جىزاق وبلىستارىنداعى 4 اۋدانمەن شەكتەسەدى.

وسىنداي گەوگرافيالىق مۇمكىندىكتى پايدالانىپ اۋداندا وزبەكستان رەسپۋبليكاسىمەن ساۋدا- ساتتىقتى دامىتۋ ءۇشىن حالىقارالىق ساۋدا كەشەنىن قۇرۋ وتە ماڭىزدى. قازاقستان رەسپۋبليكاسىنىڭ تۇڭعىش پرەزيدەنتى - ەلباسى ن. نازاربايەۆ 2018 -جىلى «ورتالىق ازيا» حالىقارالىق ساۋدا ەكونوميكالىق ىنتىماقتاستىق ورتالىعىن قۇرۋ تۋرالى تاپسىرما بەرگەن بولاتىن.


26-قاڭتاردا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيىتىلگەن وتىرىسىندا ۇكىمەت باسشىسىنا «ورتالىق ازيا» حالىقارالىق ساۋدا ەكونوميكالىق ىنتىماقتاستىق ورتالىعىن قۇرۋ ماسەلەسىن جەدەلدەتۋدى تاپسىردى.

وسىعان بايلانىستى ق ر ساۋدا جانە ينتەگراتسيا ءمينيسترى باقىت سۇلتانوۆ جانە وبلىستىق كاسىپكەرلىك جانە ساۋدا باسقارماسىنىڭ باسشىسى نۇرباقىت يمانقۇلوۆ ماقتاارال اۋدانىنا جۇمىس ساپارىمەن بارىپ، شەكارا ماڭىنداعى بەكەتتەردىڭ جۇمىسىمەن تانىستى. ءمينيستردىڭ ءىسساپارىنا وزبەكستان رەسپۋبليكاسىنىڭ وسى سالاعا جاۋاپتى ۆيتسە- مينيسترلەرى دە قوسىلدى. مينيستر مەن باسقارما باسشىسى «سەليننىي» جانە «سىرداريا» شەكارا وتكىزۋ بەكەتتەرىن ارنايى بارىپ كورىپ، حالىقارالىق ساۋدا ورتالىعىن قۇرۋ ءۇشىن نىسانداردىڭ مۇمكىندىكتەرىن قاراپ شىقتى.


اۋدان اكىمى باقىت اسانوۆ بەكەتتەردىڭ جۇمىسى مەن مۇمكىندىكتەرى تۋرالى كەڭىنەن باياندادى. ماسەلەن، «سەليننىي» شەكارا وتكىزۋ بەكەتىنە جاقىن ماڭدا «ساپار» ساۋدا بازارىن حالىقارالىق دەڭگەيدە دامىتۋعا بولاتىنىن ايتتى. «ماقتاارال اۋدانىندا ۇلى جىبەك جولىنىڭ ءبىر تارماعى سانالاتىن م-39 «تاشكەنت - تەرمەز» باعىتىنداعى ماگيسترال ءدالىزى بار. وسى اۆتوموبيل جولىنىڭ پوتەنتسيالىن پايدالانىپ، وڭىردە ساۋدا- ساتتىقتى جوعارى دەڭگەيدە دامىتۋعا مۇمكىندىگىمىز زور. ماسەلەن، ءبىر كەزدەرى حالىقارالىق دەڭگەيدە قىزمەت كورسەتكەن بەتونكانىڭ بويىنداعى «ساپار» بازارىن حالىقارالىق دەڭگەيدە قايتادان دامىتساق - وڭىردە مىڭداعان ادامدى جۇمىسپەن قامتي الامىز» ، - دەدى باقىت اسانوۆ.


«ساپار» بازارىندا مودەرنيزاتسيالاۋ جۇمىستارى 2019 -جىلى جۇرگىزىلگەن. ول ءۇشىن بازار يەسىنىڭ جەكە ەسەبىنەن 100 ميلليون تەڭگەدەن اسا قاراجات جۇمسالعان. ناتيجەسىندە ۇتىنۋشىلارعا جاعداي جاسالىپ، قوسىمشا 100 ادام جۇمىسپەن قامتىلدى. ءمينيستردىڭ سوڭعى ايالداعانى - «اتامەكەن» كەدەن بەكەتى. بۇعان دەيىن كورشى ەلگە وتپەكشى بولعان جۇك كولىكتەرى كەدەندىك بەكەت ماڭىندا كەپتەلىسكە ۇشىراپ، جول قاتىناسىن قيىنداتا تۇسكەن ەدى. ماسەلەنى شەشۋ ءۇشىن كەدەندىك بەكەتتىڭ ايماعىن كورىكتەندىرۋ، كوگالداندىرۋ، كەڭەيتۋ جوسپارى جاسالدى.

اتاپ ايتقاندا، شەكارا ماڭىنان ساۋدا لوگيستيكالىق ورتالىعىن قۇرۋ، ونىڭ ىشىندە ساۋدا بازارلارى، قوناق ءۇي، اۆتوتۇراق، قويمالار، تۇرعىن ۇيلەر مەن ءتۇرلى سپورتتىق الاڭشالاردى سالۋ كوزدەلگەن بولاتىن. قازىرگى تاڭدا اۆتوتۇراق پايدالانۋعا بەرىلگەن.

سونىمەن قاتار، كاسىپكەرلەردىڭ ەسەبىنەن باسقا دا نىساندار سالىنۋدا. مينيستر باقىت سۇلتانوۆ «ورتالىق ازيا» حالىقارالىق ساۋدا ورتالىعىن قۇرۋ ءۇشىن تاڭدالاتىن بەكەت تۋرالى جان-جاقتى زەرتتەلىپ، جوسپار قۇرىلىپ، شەشىم شىعارىلاتىنىن ايتتى.

سوڭعى جاڭالىقتار