دەپۋتاتتار قانداستار ءۇشىن كۆوتانى كوبەيتۋدى سۇرادى

«بيىل، تاۋەلسىزدىكتىڭ 30 جىلدىعىندا تاۋەلسىزدىكتىڭ حالقىمىزعا بەرگەن باستى يگىلىكتەرىنىڭ ءبىرى - الىس جانە جاقىن شەتەلدەردەن قازاقتاردىڭ وتانعا ورالۋىنا جول اشىلعانىنا دا 30 جىل تولماقشى. ەلىمىز ءوز ەركىندىگىنە قول جەتكىزەردىڭ الدىندا، 1991 -جىلعى 18 - قاراشادا قازاق ك س ر مينيسترلەر كابينەتى «باسقا رەسپۋبليكالاردان جانە شەتەلدەردەن سەلولىق جەرلەردە جۇمىس ىستەۋگە تىلەك ءبىلدىرۋشى بايىرعى ۇلت ادامدارىن قازاقستاندا قونىستاندىرۋدىڭ ءتارتىبى مەن شارتتارى تۋرالى» ارنايى قاۋلى قابىلداعان بولاتىن. ميگراتسيالىق ساياساتتىڭ 2017-2021 -جىلدارعا ارنالعان تۇجىرىمداماسىندا «1991 -جىلدان بەرى ەلگە كەلگەن ەتنيكالىق رەپاتريانتتاردىڭ سانى 1 ميلليون ادامنان استى» دەپ كورسەتىلگەن. الايدا، كەيىنگى جىلداردا، ناقتى ايتقاندا 2012 -جىلدان باستاپ ەلدەن تۇرعىنداردىڭ كوشىپ كەتۋى كۇشەيۋىنىڭ جاعىمسىز ءۇردىسى باستالدى، ول ءۇردىس قازىر كۇشەيە تۇسۋدە»، - دەدى س. ابدراحمانوۆ ءماجىلىستىڭ جالپى وتىرىسىندا.

دەپۋتات قازىرگى تاڭدا ۇكىمەت قاۋلىسىنا سايكەس قانداستارىمىز ورنالاستىرىلاتىن وڭىرلەر رەتىندە اقمولا، اتىراۋ، شىعىس قازاقستان، باتىس قازاقستان، قوستاناي، پاۆلودار، سولتۇستىك قازاقستان وبلىستارى بەكىتىلگەنىن ەسكە سالدى. وسى جەتى وبلىسقا ەتنيكالىق قازاقتاردىڭ كوشىپ كەلۋىنە بولىنگەن كۆوتا 2020 -جىلى 1378 ادام بولدى. 2021 -جىلعا بولىنگەن كۆوتا سانى 1426. ءوسىم جوققا جۋىق. ەكونوميكالىق احۋال اناعۇرلىم كۇردەلى بولعان كەزدىڭ وزىندە بۇل كۆوتا جىلىنا 10 مىڭ مەن 20 مىڭنىڭ اراسىندا ەدى، سونىڭ ارقاسىندا جىلىنا مەملەكەتتىڭ كومەگىمەن 40 مىڭنان 80 مىڭعا دەيىن ادام شەتەلدەردەن كوشىپ كەلەتىن.

«جۇمىس كۇشى ارتىق وڭىرلەردەن ادامداردى جۇمىس كۇشىن قاتتى قاجەتسىنىپ تۇرعان وڭىرلەرگە قونىستاندىرۋ جۇمىسى دا ءجوندى جۇرمەي جاتىر. تۇرعىن ءۇي ءبولۋ، جەڭىلدەتىلگەن كرەديتتەر بەرۋ، جايىلىمعا، ەگىندىككە جەر ۋچاسكەلەرىن تاراتۋ، كوشەراقى قاراجاتىن قاراستىرۋ تيىسىنشە ويلاستىرىلماعان. جاڭا وڭىرگە كوشىپ بارۋدىڭ وڭدى تاجىريبەسى دۇرىس ناسيحاتتالمايدى. مۇنداي ۇلكەن ىستە بولماي قويمايتىن كەمشىلىكتەردى الاۋلاتىپ- جالاۋلاتىپ كورسەتۋ، ءسويتىپ قايتا كوشىپ كەتۋگە بەيىم كوڭىل- كۇيدى كۇشەيتۋ، باسقا جەرگە بارىپ، باعىن سىناۋشىلاردىڭ ساعىن سالعان بەتتەن سىندىرۋ باسىم. تۋعان جەر ۇعىمىنىڭ كەڭدىگىن، «تۋعان جەر» مەن «وتان» ۇعىمدارى ورتاق ەكەندىگىن جۇرەكتەرگە جەتكىزۋ جاعى كەمشىن»، - دەدى س. ابدراحمانوۆ.

وسى ورايدا دەپۋتاتتىق ساۋالعا بايلانىستى ۇكىمەتتىڭ ەلدەگى ميگراتسيالىق جانە دەموگرافيالىق پروتسەستەردى تۇراقتاندىرۋ ماقساتىمەن قانداستارعا بولىنەتىن كۆوتانىڭ كولەمىن كوبەيتۋ، بەيىمدەۋ مەن كىرىكتىرۋ ورتالىقتارىن قۇرۋ، رەپاتريانتتارعا مەملەكەتتىك قىزمەتتى قازاق تىلىندە كورسەتۋ، جۇمىس كۇشى ارتىق وڭىرلەردەن ادامداردى سولتۇستىكتەگى وڭىرلەرگە قونىستاندىرۋ سياقتى ماسەلەلەردىڭ شەشىلۋ جولدارىن قاراستىرۋدى سۇرادى.

اۆتور: رۋسلان عابباسوۆ