قازاقستاندا الەۋمەتتىك باعدارلامالار قىزمەتى قۇرىلماق
بۇل تۋرالى قازاقپارات ەڭبەك مينيسترلىگىنە سىلتەمە جاساپ حابارلايدى.
«جۇمىسپەن قامتۋ جانە الەۋمەتتىك باعدارلامالار بولىمدەرىنىڭ ورنىنا الەۋمەتتىك باعدارلامالار قىزمەتتەرىن قۇرۋ باستاماسى بار. جۇيەدەگى قايتا قۇرۋ پروتسەستەرىن ءتيىمدى باسقارۋ ءۇشىن جەرگىلىكتى اتقارۋشى ورگانداردىڭ الەۋمەتتىك قىزمەتتەرىن قازىرگى كەزدەگىدەي وسى مىندەتتەردى ورىنداۋعا ەمەس، الەۋمەتتىك قىزمەت كورسەتۋ جونىندەگى جۇمىستاردى ۇيلەستىرۋگە جانە ۇيىمداستىرۋعا قايتا باعدارلاۋ كوزدەلەدى»، - دەلىنگەن ۇلتتىق جوسپاردىڭ جوباسىندا.
ەسكە سالا كەتسەك قازاقستاندا الەۋمەتتىك قىزمەت كورسەتۋ جۇيەسى جاڭعىرتىلاتىنى وتكەن ايدا حابارلانعان ەدى. قازىرگى ۋاقىتتا ەلىمىزدە الەۋمەتتىك قىزمەتكەرلەر تەستتەن ءوتىپ جاتىر. وسى جىلدىڭ 5 جەلتوقسانىنا دەيىن شامامەن 12 مىڭ ادامدى سىناقتان وتكىزۋ جوسپارلانۋدا. تەست الەۋمەتتىك قىزمەتكەرلەردىڭ بازالىق ءبىلىم دەڭگەيىن انىقتاۋ ءۇشىن وتكىزىلەدى. سودان كەيىن ولار وقىتىلادى. قۇجات جوباسى «اشىق دەرەكتەر» پورتالىندا ورنالاسقان.
اۆتور: ايان بەكەن ۇلى