قوردايداعى ۆاكتسينا شىعاراتىن زاۋىتتىڭ قۇرىلىسىنا قاتىستى كەڭەس ءوتتى

None
None
تاراز. قازاقپارات - جامبىل وبلىسى قورداي اۋدانىنداعى بيوفارماتسيەۆتيكالىق زاۋىت قۇرىلىسى بويىنشا كەڭەس ءوتتى، دەپ حابارلايدى قازاقپارات ءتىلشىسى.

جامبىل وبلىسىنىڭ اكىمى بەردىبەك ساپاربايەۆ قورداي اۋدانىنداعى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى بازاسىنداعى بيوفارماتسيەۆتيكالىق زاۋىتتىڭ قۇرىلىسى بويىنشا كەڭەس وتكىزدى.

وعان قازاقستان رەسپۋبليكاسى پرەمەر-ءمينيسترى كەڭسەسى كانتسلەرىنىڭ ورىنباسارى ولجاس سماعۇلوۆ، دەنساۋلىق ساقتاۋ ءمينيسترىنىڭ ءبىرىنشى ورىنباسارى مارات شورانوۆ جانە ءبىلىم جانە عىلىم ءمينيسترىنىڭ ورىنباسارى ميراس داۋلەنوۆ قاتىستى.

سونىمەن قاتار باسقوسۋدا بيولوگيالىق قاۋىپسىزدىك عىلىمي-زەرتتەۋ ينستيتۋتىنىڭ باسشىلارى، مۇددەلى مەملەكەتتىك ورگاندار، ساراپشىلار مەن مەردىگەرلەردىڭ وكىلدەرى دە بولدى. زاۋىتتىڭ قۇرىلىسى مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس جۇرگىزىلۋدە.

كاسىپورىندا الەمدىك ستاندارتتار بويىنشا يممۋنوبيولوگيالىق پرەپاراتتار، ونىڭ ىشىندە كوروناۆيرۋستىق ينفەكتسياعا، تۇماۋعا، تۋبەركۋلەزگە، برۋتسەللەزگە، نودۋليارلىق دەرماتيتكە جانە باسقا دا ينفەكتسيالىق اۋرۋلارعا قارسى ۆاكتسينالار شىعارۋ جوسپارلانۋدا.

جىلدىق ءوندىرىس كولەمى 30-60 ميلليون دوزا بيولوگيالىق ءونىمدى قۇرايدى. كەزدەسۋ بارىسىندا جوبانى ىسكە اسىرۋداعى اعىمدىق ماسەلەلەر، سونىڭ ىشىندە قۇرىلىس-مونتاجداۋ جۇمىستارى، وندىرىستىك جابدىقتى ساتىپ الۋ جانە ورناتۋ، ۆاليداتسيا جانە GMP سەرتيفيكاتتاۋ راسىمدەرى جانە باسقا دا جايتتار سارالاندى.

«زاۋىتتىڭ ستراتەگيالىق ماڭىزى بار، سوندىقتان جۇمىس ساپاسىنا جانە بەلگىلەنگەن مەرزىمدە اياتاۋعا باسا نازار اۋدارۋ قاجەت. زاۋىت وندىرىستىك تاجىريبەنىڭ (GMP) حالىقارالىق ستاندارتتارىنا سايكەس كەلۋى ءتيىس. بۇل ءۇشىن بارلىق مەملەكەتتىك ورگاندار مەن قۇرىلىمداردىڭ ۇيلەسىمدى جۇمىسى قاجەت»، — دەدى بەردىبەك ساپاربايەۆ.

سوڭعى جاڭالىقتار