بولاشاقتا قالا عيماراتى ورمانعا اينالادى

None
None
نۇر-سۇلتان. قازاقپارت - ستەفانو بوەري - زاماناۋي ساۋلەت ونەرىندەگى ەڭ تانىمال ساۋلەتشىلەردىڭ ءبىرى. جاقىندا ونىڭ كومانداسى بۇكىل يتاليا بويىنشا سالىناتىن 1500 ۋاقىتشا پاۆيلوننىڭ بىرەگەي ديزاينىن جاسادى.

ونىڭ يدەياسى بويىنشا قالا عيماراتتارى جاسىل جەلەكپەن كومكەرىلەدى. ستەفانو بوەري بالا كەزىنەن اعاشتاردى ءسۇيىپ وسكەن. جاسىل الەمگە دەگەن سۇيىسپەنشىلىگى بالا كەزىندە «اعاشتار اراسىنداعى بارون» شىعارماسىن وقىعاندا ويانعان. روماندا كەيىپكەر بالا اعاشتار الەمىنە كوتەرىلىپ، قايتپاۋعا انت بەرەدى.

«مەنىڭ ويىمشا، اعاش تا ادامدار سياقتى. ءارقايسىسىنىڭ وزىندىك دامۋ تاريحى، ءومىر سالتى جانە وزىندىك فورماسى بار»، - دەيدى ستەفانو.

بالالىق قۇمارلىق ساۋلەتشىنى Il Bosco Verticale («تىك اعاش») دەپ اتالاتىن ايگىلى عيماراتتىڭ ديزاينىن جاساۋعا شابىتتاندىرعان. ول وسىلاي ميلان قالاسىنداعى عيماراتتىڭ قاسبەتىن « ءتىرى اعزاعا» اينالدىرا الدى.

جوبا 2 عيماراتتى تۇرعىن ءۇي كەشەنىنەن تۇرادى. عيماراتتىڭ ءبىرىنىڭ بيىكتىگى 80 مەتر، ال ەكىنشىسى 112 مەتر. ولارعا 20 مىڭ اعاش، وسىمدىك پەن بۇتا ورناتىلعان.


وسىمدىكتەردى پودەزدەردەن تاماشالاي الاسىز. ال اعاشتار عيماراتتىڭ بۇيىرىنەن جوعارى قاراي «جورعالاپ» وسەدى«، - دەيدى ديزاينەر.

بوەريدىڭ ەسەپتەۋىنشە، كەشەن تۇرعىندارىنىڭ ءارقايسىسىنا 2 اعاش، 8 بۇتا جانە 40 گۇلدەن ۇلەس تيەدى.

مۇنداي باقشا ءتارىزدى قۇرىلىمدى سالۋدىڭ باستى ماقساتى - ەستەتيكانى دارىپتەۋ.

ال جاسىل جەلەكتەر پاتەرلەرگە ءسان بەرەدى، كەشەن تۇرعىندارىنا رۋحاني قۋات بەرەدى.

بوەري «عيماراتتىڭ ءار ءتۇرلى قاباتىندا 15 تۇردەن تۇراتىن جۇزدەگەن قۇس ۇياسى بار« دەيدى.

ساۋلەتشى عيماراتتار جىل سايىن 30 توننا كومىرقىشقىل گازىن ءسىڭىرىپ، 19 توننا وتتەگى بولەتىنىن ماقتانىشپەن ايتادى.

»ءبىزدىڭ قالادا جانە ونىڭ اينالاسىندا جاسىل جەلەكتەردى كوبەيتۋ - بۇل كليماتتىڭ وزگەرۋىنە جول بەرمەيتىن ەڭ جاقسى شارالاردىڭ ءبىرى. تىك بيولوگيالىق كورىنىستەر - بۇل جاسىل جەلەكتى كوبەيتۋدىڭ ءبىر ءادىسى«، - دەيدى ساۋلەتشى.

ۇلگى الۋعا تۇرارلىق قالا

2018 -جىلى قىركۇيەكتە ۆەرتيكالدى ورمان الەمدەگى ەڭ جاقسى عيماراتتارعا بەرىلەتىن RIBA حالىقارالىق سىيلىعىنىڭ فينالىنا جەتىپ، ۇزدىك تورتتىككە ەندى. بوەري جوبانىڭ ناقتى جەتىستىگى ونىڭ بىرەگەيلىگىندە ەكەنىن ايتادى.

ستەفانو ودان دا ۇلكەن جوبالاردى جۇسەگە اسىرعىسى كەلەدى. ونىڭ كومپانياسى ەۋروپانىڭ ءبىرقاتار قالالارىندا جاڭا تىك ورماندار سالۋ جوسپارىن جاريالادى. بوەريدىڭ ەرەكشە جوبالارى يتاليانىڭ تريەۆيسو قالاسىندا، شۆەيتساريانىڭ لوزانناسىندا جانە نيدەرلاندىنىڭ ۋترەحت قالاسىندا جۇزەگە اسىرىلىپ جاتىر.

»قىتايدىڭ ليۋجۋ قالاسىندا ورمان قالاسىن سالۋ جوسپاردا بار«، - دەيدى ساۋلەتشى. Forest City 139 گەكتاردان استام اۋماقتا ورنالاسقان، وعان اعاشتار سالىنعان تۇرعىن ۇيلەر، اۋرۋحانالار، مەكتەپتەر مەن كەڭسەلەر كىرەدى ەكەن.

بوەري ەگيپەت پەن مەكسيكادا دا وسىنداي قالالار سالۋعا تاپسىرىس بولعانىن ايتادى.

وندا قانداي اعاشتار مەن بۇتالار وسەتىنىن انىقتاۋ ءۇشىن ءار جەردى ەگجەي- تەگجەيلى زەرتتەۋ كەرەك (ىلعالدىلىق دەڭگەيى، جەل جانە كۇن ساۋلەسىنىڭ ءتۇسۋى) .

مىسالى، ميلانداعى ورماندى عيمارات اشىلعانعا دەيىن بوەري ەكى جىل بويى ءار ءتۇرلى وسىمدىكتەردى باقىلاپ، ولاردىڭ توزىمدىلىگىن جوبادا قولدانعان.

massaget.kz


سوڭعى جاڭالىقتار