موڭعوليا پرەمەر- ءمينيسترى وتستاۆكاعا كەتەتىنىن مالىمدەدى

ارنايى وتكەن باسپا ءسوز ءماسليحاتىندا ول ەكى كۇن بۇرىن جاڭا بوسانعان ايەلدى نارەستەسىمەن بىرگە استانالىق پەرزەنتحانادان ۇلتتىق ىشەك اۋرۋلارىن زەرتتەۋ ورتالىعىنا اۋىستىرۋ جاعدايىن ەسكە ءتۇسىرىپ، جاۋاپتى تۇلعالاردىڭ جىبەرگەن قاتەلىگى مەن راقىمسىزدىعى ءۇشىن وكىنىشىن ءبىلدىردى.

«مەملەكەتتىك قىزمەتكەرلەردىڭ اتىنان ولاردىڭ جاۋاپسىزدىعى ءۇشىن جانە ءوزىمنىڭ اتىمنان بولعان وقيعاعا بايلانىستى وكىنىشىمدى بىلدىرەمىن»، - دەپ مالىمدەدى ۋ. حۋرەلسۋح.

بۇدان كەيىن ول Covid-19 پاندەمياسى جاعدايىندا 1.6 ميلليون تۇرعىنى بار ەل استاناسىندا قاتاڭ كارانتين جانە كەيبىر ايماقتاردا قوزعالىستى تولىق شەكتەۋ بويىنشا شارالار قولدانىلعانىن ايتتى. پرەمەر- مينيستر بۇل جەردە قاتەلىكتەر جىبەرىلگەنىن اتاپ ءوتتى.

«مەنىڭ كابينەتىمنىڭ ەكى مۇشەسى اتالعان قاتەلىكتەرگە جول بەرگەنىنە قاتىستى وتستاۆكاعا كەتۋدى سۇرادى. بۇل كابينەت العاش رەت قۇرىلعاندا، ءبىز كوماندامەن جۇمىس ىستەۋدى جوسپارلاعان ەدىك. وكىنىشكە قاراي، بۇلاي بولمادى. حالىق وسىعان بايلانىستى الاڭداۋشىلىق ءبىلدىردى. جاس ازاماتتاردىڭ ۇكىمەتكە وكىنىشىن ءبىلدىرۋ ءۇشىن كوشەگە شىققانى دۇرىس. پرەمەر- مينيستر رەتىندە وسىنداي شەشىم قابىلداپ وتىرمىن، جاۋاپكەرشىلىك بارىمىزگە ورتاق بولۋى ءتيىس»، - دەدى ۋ. حۋرەلسۋح.

اۆتور: زارينا تۋعانبايەۆا