اسقار مامين تۇركىستان قالاسىنىڭ دامۋ بارىسىن تەكسەردى

پرەمەر- مينيستر ينۆەستيتسيالىق جوبالاردىڭ - «كەرۋەن- ساراي» كوپ فۋنكتسيونالدى تۋريستىك كەشەنىنىڭ، JCI حالىقارالىق ستاندارتى بويىنشا سالىنىپ جاتقان 570 توسەك ورنىنا شاقتالعان كوپبەيىندى اۋرۋحانانىڭ (2022 -جىلدىڭ جازىندا پايدالانۋعا بەرۋ جوسپارلانىپ وتىر)، قازاق دراما تەاترىنىڭ، وبلىستىق عىلىمي- امبەباپ كىتاپحانانىڭ، تۇڭعىش پرەزيدەنت ساياباعىنىڭ، دەندروپارك پەن بوتانيكالىق باقتىڭ ىسكە اسىرىلۋ بارىسىمەن تانىستى.

سونداي- اق ا. مامين پايدالانۋعا بەرىلگەن «Hampton» قوناق ءۇيى مەن حالىقارالىق تۋريزم ۋنيۆەرسيتەتىن ارالاپ كوردى. پرەمەر- مينيستر ءوڭىردىڭ الەۋمەتتىك- ەكونوميكالىق دامۋى جانە بيىل كوكتەمدە تۇركىستان قالاسىندا وتكىزۋ جوسپارلانىپ وتىرعان تۇركىتىلدەس مەملەكەتتەردىڭ ىنتىماقتاستىق كەڭەسىنىڭ سامميتىنە دايىندىق ماسەلەلەرى جونىندە كەڭەس وتكىزدى.

ۇكىمەت باسشىسىنىڭ قاتىسۋىمەن تۇركىستان وبلىسىنىڭ اكىمدىگى، «Artel Electronics» وزبەك كومپانياسى جانە «Orbis Kazakhstan» ج ش س اراسىندا ىنتىماقتاستىق تۋرالى كەلىسىمگە قول قويىلدى. قۇجات وڭىردە اس ءۇي پليتالارى مەن ەلەكتر سۋ جىلىتقىشتارىن شىعاراتىن زاۋىت سالۋدى كوزدەيدى. قۋاتتىلىعى - جىلىنا 1 ميلليون بىرلىك تەحنيكا. جوسپارلانعان ينۆەستيتسيا كولەمى - 36 ميلليارد تەڭگە. كاسىپورىن 2100 جاڭا جۇمىس ورنىن قۇرۋدى قامتاماسىز ەتەدى.

2020 -جىلى تۇركىستان قالاسىنىڭ نەگىزگى كاپيتالىنا سالىنعان ينۆەستيتسيالار 2019 -جىلمەن سالىستىرعاندا 3,8 ەسە ءوسىپ، 367,6 ميلليارد تەڭگەنى قۇرادى. ينۆەستيتسيالاردىڭ نەگىزگى ۇلەسى تۋريزم، لوگيستيكا جانە جىلجىمايتىن مۇلىك سالالارىنا باعىتتالدى. تۇركىستان وبلىسىنىڭ نەگىزگى كاپيتالىنا سالىنعان ينۆەستيتسيالار 2020 -جىلى 703,3 ميلليارد تەڭگەگە جەتتى (%60+). قۇرىلىس جۇمىستارىنىڭ كولەمى % 65,8- عا 299,9 ميلليارد تەڭگەگە دەيىن ۇلعايدى. وبلىس ينۆەستيتسيالاردىڭ ءوسۋ قارقىنى جانە جالپى وڭىرلىك ءونىمنىڭ ءوسۋى بويىنشا جەتەكشى پوزيتسياعا يە بولدى.