ءتورت كەنشىنىڭ ءولىمى: جۇمىس بەرۋشىلەردىڭ كىناسى دالەلدەندى

بۇگىن تەكسەرۋ قورىتىندىسى شىعارىلدى، دەپ حابارلايدى قازاقپارات ءتىلشىسى. 2020 -جىلدىڭ 30 جەلتوقسانى كۇنى ساعات 21:21-دە حرومتاۋ اۋدانى كوكتاۋ كەنتىنەن 30 شاقىرىم جەردە ورنالاسقان «اقتوبە مىس كومپانياسى» ج ش س-نىڭ «ۆەسەننيايا ارالچينسكايا» شاحتاسىندا جارىلىس جۇمىستارىن جۇرگىزۋ كەزىندە ءتورت جۇمىسشى مەرت بولعان ەدى.

ەڭبەك جانە حالىقتى الەۋمەتتىك قورعاۋ مينيسترلىگى جانىنان قۇرىلعان كوميسسيا بۇگىن تەكسەرۋ قورىتىندىسىن شىعاردى.

«جۇمىسشىلار ۋلانىپ، كوز جۇمعان. ساۋالناما جانە جۇمىس بەرۋشىنىڭ تەحنيكالىق قۇجاتتاماسى مەن جينالعان ماتەريالداردى سارالاي كەلە جۇمىستىڭ دۇرىس ۇيىمداستىرىلماعانى، ەڭبەك قاۋىپسىزدىگى، ەڭبەكتى قورعاۋ قاعيدالارىنىڭ بۇزىلعانى انىقتالدى. ياعني، 90 پايىز جۇمىس بەرۋشىنىڭ، 10 پايىزى جۇمىسشىلاردىڭ كىناسى. وعان«ۆەسەننيايا ارالچينسكايا» كەن ورنىنىڭ باس ينجەنەرى ن. سافين كىنالى. ول جارىلىس جۇمىستارى كەزىندە قاۋىپسىزدىكتى قامتاماسىز ەتپەگەن، جەلدەتكىش جۇمىسىن توقتاتقان. شاڭ جەلدەتۋ قىزمەتى ۋچاسكەسىنىڭ باستىعى ا. حارراسوۆ جارىلىس جۇمىستارىنان سوڭ جەراستىنداعى اۋا ەسەپتەگىش قۇرالىعىسىنىڭ دۇرىس جۇمىس ىستەۋىن قامتاماسىز ەتپەگەن. ال قازا تاپقان جۇمىسشىلار قاۋىپسىزدىك ەرەجەسىن ساقتامادى. تەرگەۋ قورىتىندىسى پوليتسياعا بەرىلدى»، - دەدى اقتوبە وبلىستىق ەڭبەك ينسپەتسياسى باسقارماسىنىڭ باسشىسى سالامات امانبايەۆ.

ايتا كەتەيىك، اقتوبە مىس كومپانياسى مەرت بولعان جۇمىسشىلاردىڭ وتباسىنا 20 ميلليون تەڭگە ءبولدى. بۇل - ءبىرجولعى كومەك. سونىمەن بىرگە بارلىعىنىڭ باسپانا ماسەلەسى شەشىلەدى. ياعني، ءار وتباسىنا ءبىر پاتەر بەرىلەدى. ولار پاتەردى اۋدان ورتالىعىنان نەمەسە اقتوبە قالاسىنان الا الادى. بالالارى 18 جاسقا جەتكەنشە اكەلەرىنىڭ ەڭبەكاقىسىن الىپ وتىرادى. ال امان قالعان جۇمىسشىعا دەنساۋلىعىن قالپىنا كەلتىرۋ ءۇشىن 5 ميلليون تەڭگە ءبىرجولعى كومەك بەرىلدى.

اۆتور: التىناي ساعىندىقوۆا