پوليتسيا قىزمەتكەرىنە شابۋىل جاساعان پەتروپاۆل تۇرعىنى ۇستالدى

None
None
پەتروپاۆل. قازاقپارات - پەتروپاۆل قالاسىندا ءتارتىپ ساقشىلارى پوليتسيا قىزمەتكەرىنە شابۋىل جاساعان ەر ادامدى ۇستادى، دەپ حابارلايدى قازاقپارات.

الەۋمەتتىك جەلىدە پەتروپاۆلدا پوليتسەيلەرگە شابۋىل جاسالعانى تۇسىرىلگەن ۆيدەو تاراتىلىپ جاتىر. وقيعا «ۆوسحود» جاتاقحاناسىندا ورىن العان. كادرلاردا جاس ەر ادامنىڭ وزىنە جاقىنداپ كەلە جاتقان ءتارتىپ ساقشىسىن كورىپ، وزىنە پىشاق جاراقاتتارىن سالىپ، پوليتسەيلەردى ونىمەن قورقىتىپ جاتقانى كورىنىپ تۇر. سول مەزەتتە تاسپا وبەكتيۆىنە تاعى ءبىر ەر ادام ءتۇسىپ قالدى. ولار ءتارتىپ ساقشىلارىمەن توبەلەسە باستادى. پوليتسيا دەپارتامەنتىنىڭ باسپا ءسوز قىزمەتىندە وقيعانى ءتۇسىندىرىپ ءوتتى.

«102» نومىرىنە «ۆوسحود» جاتاقحاناسىندا ەكى ەر ادامنىڭ توبەلەس شىعارعانى تۋرالى حابارلاما كەلىپ ءتۇستى. وقيعا ورنىنا پاترۋلدىك پوليتسيا باتالونىنان قۇرالعان قىزمەتكەرلەر جىبەرىلدى. ءمان-جايدى انىقتاۋ بارىسىندا كۇدىكتى ەر ادام قارسىلىق رەتىندە قۇقىق قورعاۋ قىزمەتكەرلەرىنە قارسى كۇش قولداندى. اتالعان فاكتى سوت الدىنداعى تەرگەۋدىڭ ءبىرىڭعاي تىزىلىمىندە «ءتارتىپ ساقشىسىنا قاتىستى زورلىق كورسەتۋ» قىلمىستىق بابى بويىنشا تىركەلگەن»، - دەپ حابارلادى ۆەدومستۆونىڭ باسپا ءسوز قىزمەتىنەن.

پەتروپاۆل قالاسىنىڭ 29 جاستاعى تۇرعىنى ۋاقىتشا تەرگەۋ وقشاۋلاعىشىنا قامالدى. قاجەتتى تەرگەۋ امالدارى جۇرگىزىلىپ جاتىر، ولاردىڭ قورىتىندىسى بويىنشا زاڭدى پروتسەسسۋالدىق شەشىم قابىلدانادى.

اۆتور: زارينا قاھارمان

سوڭعى جاڭالىقتار