بەلگيادا كوروناۆيرۋستىڭ «بريتاندىق» شتاممى تاراپ جاتىر

مۇندا 128 ادام ۆيرۋستىڭ مۋتاتسيالانعان ءتۇرىن جۇقتىرعان. ولاردىڭ 63 ءى قارتتار ءۇيىنىڭ تۇرعىنى، دەپ حابارلايدى قازاقپارات مەنشىكتى ءتىلشىسى.

قازىرگى ۋاقىتتا بەلگيادا كوروناۆيرۋستىڭ بريتاندىق شتاممىن جۇقتىرۋ جاعدايلارىنىڭ جالپى سانى از، ءبىراق بۇل سان ءسوزسىز ارتادى، دەپ مالىمدەدى جەكسەنبىدە بەلگيالىق ۆيرۋسولوگ مارك ۆان رانست.

«جاڭا جىلدان باستاپ ولاردىڭ سانى وسۋدە. ءبىز بريتاندىق شتاممدى جۇقتىرۋشىلاردىڭ كوبەيگەنىن بايقاپ وتىرمىز. روجدەستۆو مەرەكەلەرىنەن كەيىن ەلگە ساياحاتشىلاردىڭ كەلۋى ونىڭ تارالۋىنا ىقپال ەتكەن بولۋى مۇمكىن. الداعى ۋاقىتتا جاعدايدىڭ قالاي داميتىنىن كورەيىك»، - دەدى م. رانست. ۆيرۋسولوگ بريتاندىق شتاممعا ءمان بەرۋ قاجەت دەپ سانايدى.

«وسى ءارتۇرلى شتامداردى انىقتاۋ وتە ماڭىزدى. اۋرۋدىڭ اۋىرلىعى وزگەرىسسىز قالسا دا، نازار اۋدارۋ كەرەك. سوندىقتان COVID-19 عا قاتىستى شارالاردى، ونىڭ ىشىندە بريتاندىق شتامممەن كۇرەستە اتالعان تالاپتاردى ساقتاۋ ماڭىزدى. سونىمەن قاتار، بولمەلەردى دۇرىس جەلدەتۋ دە ماڭىزدى»، - دەپ كەڭەس بەردى بەلگيالىق مامان.

اۆتورى: ارنۇر راحىمبەكوۆ