جىلدام ءجۇرۋ تەحنيكاسى

None
None
نۇر-سۇلتان قازاقپارات - تەز شارشاپ قالاتىن بولساڭىز اەروبتى جاتتىعۋمەن شۇعىلدانعان ءجون.

سوندا جۇرەك پەن وكپەنىڭ جۇمىسى جاقسارىپ، قان اينالىمى دۇرىستالادى. ال جاتتىعۋدىڭ ەڭ قاراپايىم ءتۇرى - جىلدام ءجۇرۋ.

ارتىق سالماعى بار ادامدار جىلدام ءجۇرىپ-اق دەنە ءبىتىمىن قالپىنا كەلتىرە الادى. ويتكەنى جىلدام جۇرگەندە مينۋتىنا 8 كيلوكالوريا جويىلادى. ال ءبىر ساعاتتا 500 كيلوكالوريادان ارىلۋعا بولادى.

جىلدام جۇرىسپەن شۇعىلدانۋ ءۇشىن الدىمەن دۇرىس اياق كيىم تاڭداعان ءجون. تابانى قالىڭ ءارى جۇمساق بولۋى ءتيىس. ال اياق كيىمنىڭ ءوزى اۋا وتكىزەتىن ماتەريالدان جاسالۋى كەرەك. جاتتىعۋ كەزىندە ىڭعايسىز بولماۋى ءۇشىن جەڭىل اياق كيىم تاڭداعان ابزال.

جاتتىعۋدا ماڭىزدىسى - ءجۇرىس تەحنيكاسىن ساقتاۋ. قادام اراسى ءجيى بولعانىمەن، بايىپپەن ءجۇرۋ قاجەت. ەگەر ەنتىكسەڭىز، ءجۇرىستى باياۋلاتىڭىز. ارقا مەن باستى تىك ۇستاپ، ءتۇزۋ قادام جاساڭىز. قول بەلدەن كەۋدەگە دەيىن كوتەرىلۋى ءتيىس.

جىلدام جۇرىسپەن وزىڭىزگە ىڭعايلى كەز كەلگەن جەردە اينالىسۋعا بولادى. تاۋ بولسىن، دالا بولسىن، ساياباق بولسىن، ءوزىڭىزدىڭ مۇمكىندىگىڭىزگە قاراي شۇعىلداناسىز. تاۋعا شىققاندا نەمەسە تومەن تۇسكەندە وزىندىك تەحنيكالارى بار. ءبىراق مۇنىڭ بارلىعى تاجىريبە ارقىلى قالىپتاسادى.

جۇرگەن كەزدە قوزعالىس ۇزاقتىعى مەن جىلدامدىعى اركىمدە ءارقالاي. بۇل رەتتە، ەگەر ءسىز تەحنيكانى قاداعالاپ، كۇش سالساڭىز، ناتيجە شىعادى. ورتا ەسەپپەن اپتاسىنا كەمىندە ءۇش رەت مينيمۋم 45 مينۋتتان اينالىسۋ كەرەك. ءبىراق ءبىر ساعات جۇرگەنىڭىز ابزال.

جىلدام ءجۇرىس - قاۋىپتى سپورت تۇرلەرىنىڭ قاتارىنا جاتپايدى. جاراقات الۋ كورسەتكىشى دە تومەن. بارلىق جاستاعى ادام ءۇشىن پايدالى. ءبىراق كەز كەلگەن سپورت ءتۇرى سەكىلدى مۇندا دا جولعا شىعار الدىندا دەنە قىزدىرىپ الۋ كەرەك. سىرقاتتانىپ قالعاندا، سوزىلمالى اۋرۋلار اسقىنعاندا، وتادان كەيىنگى كەزەڭدە، تىرەك-قيمىل اپپاراتى اۋىر زاقىمدانعان جاعدايدا جاتتىعۋدى كەيىنگە قالدىرىڭىز.

جىلدام جۇرىسپەن بارلىق ادامنىڭ شۇعىلدانۋىنا بولادى. بۇل سپورت ءتۇرى ادامدى توزىمگە ۇيرەتىپ، دەنساۋلىعى جاقسارۋىنا سەپ بولادى.

- ادام بويىنداعى بۇلشىقەتتىڭ %90 شىنىعادى؛

- اياق بۋىنى مەن ومىرتقاعا تۇسەتىن كۇش %30 عا ازايادى؛

- جۇرەك سوعىسى مينۋتىنا 10- 15 كە ارتادى، بۇل جۇرەك-قان تامىرلارى جۇيەسىنە پايدالى؛

- جاي جۇرۋگە قاراعاندا كالوريا كوبىرەك جۇمسالادى، ناتيجەسىندە ارىقتاۋعا كومەكتەسەدى؛

- وكپەنىڭ كولەمى مەن دەم الاتىن وتتەگىنىڭ مولشەرى ارتادى؛

- دەنە ءمۇسىنى مەن قوزعالىس كوورديناتسياسى جاقسارادى؛

- زات الماسۋ مەن ۇيقى قالىپتى بولىپ، ومىرلىك تونۋس ارتادى؛

الماز شارمان، مەديتسينا عىلىمىنىڭ پروفەسسورى

massaget.kz

سوڭعى جاڭالىقتار