قازاقستان نيۋ-يوركتە ب ۇ ۇ قاۋىپسىزدىك كەڭەسىنىڭ جاڭا مۇشەلەرىنىڭ تۋلارىن ورناتۋ ءراسىمىن وتكىزدى

بۇل تۋرالى قازاقپارات ق ر سىرتقى ىستەر مينيسترلىگىنىڭ Telegram كانالىنا سىلتەمە جاساپ حابارلايدى.

ب ۇ ۇ ق ك زالىنىڭ الدىندا وزدەرىنىڭ ۇلتتىق جالاۋلارىن ءۇندىستاننىڭ، يرلانديانىڭ، كەنيانىڭ، مەكسيكانىڭ جانە نورۆەگيانىڭ تۇراقتى وكىلدەرى ورناتتى. قاۋىپسىزدىك كەڭەسىنىڭ جاڭا جىلداعى جۇمىسىنىڭ العاشقى كۇنىندە ءراسىمدى وتكىزۋ ءداستۇرى قازاقستان - 2018-جىلدىڭ قاڭتارىندا دۇنيەجۇزىلىك ۇيىمنىڭ وسى ورتالىق ورگانىنا ءتوراعالىق ەتۋ كەزىندە نەگىزى قالانعان بولاتىن.

ءراسىمدى اشا وتىرىپ، قازاقستاننىڭ ب ۇ ۇ جانىنداعى تۇراقتى وكىلى ماعجان ءىلياسوۆ وتكەن جىل الەمنىڭ بارلىق ەلدەرى ءۇشىن قيىن بولعانىن اتاپ ءوتتى.

2021 -جىلى تۇراقتى دامۋ، بەيبىتشىلىك پەن قاۋىپسىزدىك كوبىنە ب ۇ ۇ مەن ونىڭ قاۋىپسىزدىك كەڭەسىنىڭ شەشىمدەرىنە بايلانىستى بولاتىندىعىن باسا ايتىپ، ول 2020-جىلى العان ساباقتاردى تالداۋعا جانە ىنتىماقتاستىقتىڭ، ىمىراعا كەلۋدىڭ جانە جاھاندىق بەيبىتشىلىككە بەيىلدىلىگىنىڭ ۇلگىلەرىن بولاشاق جۇمىسىمىزدا قولدانۋعا شاقىردى.

«جاڭا جىل ءبارىمىز ءۇشىن جانە ءبىزدىڭ دۇنيەجۇزىلىك ۇيىمىمىز ءۇشىن ءۇمىت جىلى بولادى. ءبىزدىڭ ۇمىتتەرىمىزدى بارلىق ادامدار ءۇشىن شىنايى يگىلىكتەرگە جانە وڭ وزگەرىستەرگە اينالدىرۋ ءۇشىن ناقتى ءىس-قيمىل قاجەت»، - دەدى ەلشى قاۋىپسىزدىك كەڭەسىنىڭ سايلانعان مۇشەلەرىنە ارناعان سوزىندە.

ول جينالعاندارعا ب ۇ ۇ- نىڭ نەگىزگى ورگاندارىنىڭ بىرىندە بەلگىلەنگەن جۇمىس جوسپارلارىن جۇزەگە اسىرۋدا ساتتىلىك تىلەدى. قازاقستاننىڭ تۇراقتى وكىلى سونىمەن قاتار كوروناۆيرۋس پاندەمياسىنا قارسى كۇرەستەگى ەرلىككە ادالدىعى ءۇشىن بۇكىل الەمدەگى مەديتسينا قىزمەتكەرلەرىنە، سونداي-اق عالىمدار مەن زەرتتەۋشىلەرگە COVID-19 عا قارسى ۆاكتسينا جاساۋ جونىندەگى كۇش-جىگەرى ءۇشىن ريزاشىلىعىن ءبىلدىردى. قاۋىپسىزدىك كەڭەسىنىڭ ءتوراعاسى، تۋنيستىڭ ب ۇ ۇ جانىنداعى تۇراقتى وكىلى تارەك لادەب قازاقستانعا ءىس-شارانى ۇيىمداستىرعانى ءۇشىن العىس ايتتى.

ونىڭ ايتۋىنشا، پاندەميا جاعدايىنداعى جۇمىستىڭ كۇردەلەنە تۇسكەنىنە قاراماستان، بۇل ءراسىم قاۋىپسىزدىك كەڭەسىنىڭ جاڭا تۇراقتى ەمەس مۇشەلەرىنە سالتاناتتى جاعدايدا جاھاندىق بەيبىتشىلىك پەن قاۋىپسىزدىكتى ساقتاۋ بويىنشا ءوز مانداتتارىن ورىنداۋدى باستاۋعا مۇمكىندىك بەردى.

ءوز كەزەگىندە ءۇندىستاننىڭ، يرلانديانىڭ، كەنيانىڭ، مەكسيكانىڭ جانە نورۆەگيانىڭ تۇراقتى وكىلدەرى 2021-2022-جىلدارعا ارنالعان كەڭەستەگى جۇمىسىنىڭ باسىمدىقتارى تۋرالى ءسوز سويلەدى. قازاقستاننىڭ باستاماسىنان بۇرىن قاۋىپسىزدىك كەڭەسىنىڭ زالى الدىندا ب ۇ ۇ قاۋىپسىزدىك كەڭەسى تۇراقتى ەمەس مۇشەلەرىنىڭ تۋلارىن اۋىستىرۋى تەحنيكالىق ءراسىمى بولدى.

جاڭا ءداستۇردى ەنگىزۋىمەن بۇل ءراسىم بۇقارالىق اقپارات قۇرالدارى وكىلدەرىنىڭ قاتىسۋىمەن كەڭەستىڭ جىل سايىنعى باعدارلاماسىنىڭ ءبىرىنشى جۇمىس كۇنىندەگى رەسمي ءىس-شاراعا اينالدى.

2019-جىلى قاڭتاردا قازاقستاننىڭ تۇراقتى وكىلدىگى ب ۇ ۇ قاۋىپسىزدىك كەڭەسى مۇشەلەرىنىڭ تۋلارى ءۇشىن قازاقستاندا جاسالعان جانە قازاق ۇلتتىق ويۋلارمەن بەزەندىرىلگەن ارنايى تۇعىرلار سىيلادى.